Gjykata e Tiranës pushoi hetimet për dosjen e privatizimit të OSSh nga çekët e ÇEZ në vitin 2007. Hetimet kishin filluar pas kallëzimit nga kreu i Grupit Parlamentar të Partisë Socialiste.
Gjykata e Tiranës vendosi të premten më datë 24 janar që të pranojë kërkesën e prokurorisë për pushimin e hetimeve për procedurën e privatizimit e atëherë Operatorit të Sistemit të Shpërndarjes, OSSh, [Tani OSHEE] nga çekët e ÇEZ në vitin 2007. Çështja në fjalë ka qenë e regjistruar për veprën penale “ushtrim i ndikimit të paligjshëm” dhe hetohej nga viti 2017.
Për këtë çështje u ngrit më parë edhe një Komision Hetimor Parlamentar i drejtuar nga deputeti i Partisë Socialiste Taulant Balla. Komisioni Hetimor Parlamentar arriti në konkluzionin se procedura e privatizimit i kishte shkaktuar shtetit një dëm financiar mbi 400 milion dollarë dhe kreu kallëzim penal në prokurori.
Prokuroria e dërgoi edhe më parë këtë çështje për pushim, por gjykata i la për detyrë kryerjen e disa veprimeve të tjera hetimore dhe marrjen e deklarimeve të disa zyrtarëve, mes tyre edhe marrjen e dëshmisë së Shkëlzen Berishës, djalit të ish-kryeministrit Sali Berisha. Ndërkohë edhe pas kryerjes së këtyre “detyrave” prokuroria nuk ka evidentuar përgjegjës dhe e ka ridërguar për pushim në gjykatë në fillim të dhjetorit.
Prokurori i çështjes Erjon Imeraj tha për BIRN gjatë një komunikimi telefonik se, “çështja u dërgua që në fillim të dhjetorit për pushim në gjykatë, pasi nuk u arrit të siguroheshin prova edhe pas kryerjes së detyrave të lëna më parë nga gjykata”. Imeraj tha se Ndue Kalaj që pretendohej prej denoncuesve si një prej dëshmitarëve kyç të çështjes nuk u gjet as në Shqipëri dhe as në Kosovë.
Kërkesa e prokurorisë është vlerësuar nga gjyqtari Lazer Sallaku i cili vendosi të premten të pranojë kërkesën për pushim.
Por kryetari i grupit parlamentar të Partisë Socialiste, Taulant Balla, i cili ka dorëzuar kallëzimin për këtë çështje, pretendoi në një reagim në Facebook se vendimi i marrë nga Gjykata e Tiranës ishte në kundërshtim me ligjin dhe se çështja duhej të kishte shkuar për kompetencë në Gjykatën e Posaçme. Balla po ashtu tha se çështja do të apelohej, ndërsa pretendoi se kallëzimi do i dërgohej SPAK.
I pyetur mbi kompetencën prokurori Imeraj iu referua dispozitave tranzitore të Kodit të Procedurës Penale, i cili parashikon vijimin e gjykimit të çështjeve të nisura më parë në gjykatat ku ato kishin filluar.
