Një 57 vjeçar që punonte si lulishtar pranë Kolegjit Universitar Qiriazi në Kodër-Kamëz ka vdekur në një aksident ende të pa sqaruar.
Një 57 vjeçar që punonte si lulishtar pranë Kolegjit Universitar Qiriazi në Kodër-Kamëz u gjet i vdekur nga policia të mërkurën në mesditë. Policia njoftoi se 57-vjeçari me inicialet E.L kishte rënë nga lartësia. “Rreth orës 13:15, në Rrugën e Kastriotëve” duke punuar tek godina e një shkolle aksidentalisht ka rënë nga lartësia shtetasi E.L, 57 vjeç”, njoftoi policia.
Një punonjëse e Kolegjit Universitar Qiriazi që u përgjigj në numrin publik në faqen e tyre dhe tha se ishte Denisa Cane, Drejtoresha e Financave, tha se ata nuk i dinin rrethanat e ngjarjes. Punonjësja tha se i ndjeri ishte kopshtar dhe se nuk kishte qenë duke punuar në lartësi, por në katin e parë. Ajo shtoi se nuk e dinin çfarë kishte ndodhur. “E kishim si të familjes, jemi tronditur shumë”, tha ajo.
Ky është aksidenti i dytë me vdekje në vendin e punës brenda 24 orë ve të fundit. Mbi 30 punëtorë humbën jetën vitin e kaluar në aksidente në punë kryesisht në ndërtim dhe në miniera. BIRN ka gjetur në një investigim të mëparshëm se në pjesën më të madhe faji për aksidentet u lihet viktimave, ndërsa kompanitë ndëshkohen me gjoba minimale.