Roja 62-vjeçar i një pallati në ndërtim në Durrës u vra pasi ra nga kati i dytë i godinës ku punonte. Arrestohet administratori dhe inxhinieri i kompanisë që po ndërtonte objektin.
Një burrë 62-vjeç, i cili punonte si roje në një objekt në ndërtim në qytetin e Durrësit, humbi jetën pasi ra nga lartësia rreth orës 23.30 të së martës. Policia e Durrësit njoftoi se Thoma Rusta, roje objekti, kishte rënë nga kati i dytë i godinës ku po qëndronte.
Policia njoftoi se nga hetimet paraprake kishte rezultuar se vdekja ishte shkaktuar nga mungesa e rregullave të sigurisë teknike në punë dhe bëri me dije arrestimin e administratorit dhe inxhinierit të kompanisë që po kryente ndërtimin. “Në përfundim të veprimeve, specialistët për Hetimin e Krimit bënë arrestimin në flagrancë të shtetasve A. J., 47 vjeç, banues në Durrës, administratori i firmës dhe E. R., 43 vjeç, banues në Durrës, inxhinier i firmës që po ndërton objektin”, njoftoi policia.
Policia nuk e publikoi emrin e kompanisë në të cilën ndodhi ngjarja, por BIRN gjeti se bëhej fjalë për DCI Company”, e cila që prej muajit shtator 2018 po ndërton në zonën turistike të plazhit të Currilave 2 hotele dhe disa vila turistike. Administratori i saj është Ardian Jasimi, siç rezulton në Qendrën Kombëtare të Biznesit dhe që përkon me inicialet e të arrestuarit nga policia për akuzën e “Shkeljes së rregullave të mbrojtjes në punë”. BIRN kontaktoi me numrat e kontaktit të kompanisë për një koment, por deri në publikimin e këtij shkrimi ishin të paarritshëm.
BIRN mësoi se rasti po hetohet edhe nga Inspektorati Shtetëror i Punës dhe Shërbimeve Shoqërore. “Do të bashkëpunohet edhe me organet e policisë nëse inspektori nuk e ka të mundur të marrë të dhëna. Ndaj subjektit i vijojnë të gjitha procedurat ligjore për shkeljet që mund të evidentohen përgjatë inspektimit”, tha për BIRN Irena Gjoka, Përgjegjëse e Sektorit të Inspektimit të Sigurisë në Punë në Durrës. Ajo shtoi se pas hetimit të rastit dhe shqyrtimit të dokumenteve e provave, do të vlerësohet nëse është aksident në punë.
Policia e Durrësit njoftoi se të arrestuarit “rrezikojnë të dënohen deri në 10 vjet burg” dhe materialet për ngjarjen i kaluan për veprime të mëtejshme hetimore Prokurorisë së Rrethit Gjyqësor Durrës.
Mbi 30 punëtorë humbën jetën vitin e kaluar në aksidente në punë kryesisht në ndërtim dhe në miniera. BIRN ka gjetur në një investigim të mëparshëm se në pjesën më të madhe faji për aksidentet u lihet viktimave, ndërsa kompanitë ndëshkohen me gjoba minimale.e materialet për ngjarjen i kaluan për veprime të mëtejshme hetimore Prokurorisë së Rrethit Gjyqësor Durrës.
Mbi 30 punëtorë humbën jetën vitin e kaluar në aksidente në punë kryesisht në ndërtim dhe në miniera. BIRN ka gjetur në një investigim të mëparshëm se në pjesën më të madhe faji për aksidentet u lihet viktimave, ndërsa kompanitë ndëshkohen me gjoba minimale.