Një paslëkundje e fortë gjatë mbrëmjes të së martës ka shkaktuar panik në Durrës dhe Tiranë, dy nga qytetet më të prekura nga tërmeti i 26 nëntorit.
Një tjetër tërmet me magnitudë 4.9 të shkallës Rihter është ndjerë në orët e mbrëmjes së datës 28 janar në qytetin e Tiranës dhe Durrësit, me epiqendër në fshatin Bubq. Ai u pasua edhe nga dy pasgoditje të tjera më të vogla, por që përhapën mjaftueshëm panik tek banorët e këtyre qyteteve, ku qindra njerëz braktisën shtëpitë e tyre dhe kaluan disa orë jashtë ose në makina gjatë natës.
Goditja e fundit ka qenë në orën 07:49 të mëngjesit të sotëm të 29 Janarit. Ndërkohë, ekspertët e sizmologjisë i shpjegojnë lëkundje të tilla si pasgoditje, të cilave nuk mund t’u parashikohet tendenca e fuqisë në rënie apo në rritje pas 26 nëntorit.
“Në mënyrë statistikore, ato kanë ardhur duke u zvogëluar, por herë pas herë ka rënë dhe ndonjë me magnitudë më të madhe”, është shprehur sizmologu Rrapo Ormeni në emisionin Opinion në TV Klan, duke ju referuar lëkundjes sizmike të së martës në mbrëmje.
Gjatë javëve të fundit goditjet sizmike nuk po e lënë të qetë vendin tonë, dhe jo vetëm. Në harkun e kësaj jave, Shqipëria, por edhe Turqia, Greqia, Irani dhe Kuba janë goditur nga tërmete të magnitudës mbi 6 të shkallës Rihter.
Me 26 nëntor Shqipëria e Mesme u godit nga një tërmet 6.3 ballë i shkallës Rihter që u mori jetën 51 personave në Thumanë, Tiranë, Lezhë dhe Durrës, dhe dëmtoi me qindra banesa, duke lënë mijëra vetë të pastrehë.
