Pesë të arrestuar për një krim të shkaktuar nga prishja e pazareve të trafikut të kokainës në Britaninë e Madhe u lanë në burg nga gjykata e Tiranës të Premten ndërsa të akuzuarit u deklaruan të pafajshëm.
Një ndërtesë e bardhë me stil antik me kolonada, lulishte dhe shatërvanë në anë të rrugës Tiranë-Plepa ka ofruar prej vitesh mjedise luksi për organizimin e dasmave ndërsa një makinë policie është stacionuar aty prej ditësh pasi në bodrumin e këtij kompleksi dyshohet se Jan Prenga, një 49 vjeçar nga Kamza, ka vdekur pasi është rrëmbyer për shkak të mosmarrëveshjeve të një bande kriminale të trafikut të drogave të rënda nga Amerika Latine me të vëllanë e tij në Britaninë e Madhe.
Policia thotë se ka prova të pakundërshtueshme që Jan Prenga ka vdekur nga dhuna në ditën e rrëmbimit, më 17 Janar, ndërsa kufoma e tij është zhdukur. Katër persona, Leonard Hajri, Elton Hajri, Bajram Hajri dhe Olsi Turja, u arrestuan nga policia të Martën nën akuzën e rrëmbimit të personit, armëmbajtjes pa leje dhe fshehja apo asgjësimi i kufomës. Të Mërkurën, policia arrestoi edhe 30 vjeçarin Festim Bexhdilli nga Kavaja, i cili akuzohet për “fshehje ose asgjësim të kufomës”.
Të Premten, të pestë u deklaruan të pafajshëm para gjyqtarit Sokol Tona ndërsa prokurori Leonard Filopati kërkoi arrest me burg për të dyshuarit. Gjykata pranoi kërkesën e tij.
Të Enjten policia bëri të ditur se ka zgjeruar operacionin në lidhje me këtë krim në zonën e Shkodrës.
Resorti Golden, salloni i dasmave ku dyshohet se do të mbahej peng viktima, është nën pronësinë e Altin Hajrit, 36 vjeç, i cili aktualisht është shpallur në kërkim. Ai ka pasur precedentë penalë në Itali në vitin 2015 për trafik droge.
