Nën masa të rrepta sigurie dhe praninë e dhjetëra forcave speciale të policisë, disa qindra anëtarë të forumit rinor të Partisë Demokratike protestuan te kryeministria në Tiranë për të përkujtuar në këtë mënyrë edhe 29 vjetorin e rrëzimit të bustit të diktatorit Enver Hoxha më 20 shkurt 1991.
Një grup të rinjsh, studentësh e aktivistësh të Forumit Rinor të Partisë Demokratike protestuan në Tiranë para kryeministrisë kundër asaj që e quajtën kapje të Sqipërisë nga krimi dhe droga. Nën sloganin “Nga krimi, nga droga, na iku Europa”, ata e ilustruan protestën me printime të gazetave të ndryshme të huaja që kanë raportuar mbi drogën dhe krimin në Shqipëri.
“Sot, pas 29 vjetësh fatkeqësisht ndodhemi nën kushtet e një diktature të dytë ku vendi është i marrë peng. Papunësi kudo, varfëri kudo, mjerim kudo, propagandë kudo…krimi dhe bandat janë kthyer në ligj ndërkohë që ligji ka marrë arratinë“, tha e revoltuar Klarisa Rexhvelaj, studente e stomatologjisë , duke theksuar se ka vendosur të rrijë në Shqipëri dhe të kontribuojë për të ardhmen e vendit në një kohë kur të gjithë po largohen.
Më 20 Shkurt të vitit 1991 mijëra qytetarë nga çdo qytet i Shqipërisë u mblodhën në sheshin Skëndërbej ku në një revoltë të përbashkët ata përmbysen bustin e diktatorit Enver Hoxha.
Si iniciatorë u bënë një grup studentësh të cilët filluan një grevë urie në përpjekje për t’i hequr emrin e Enver Hoxhës universitetit ku ata studionin. Ky revolucion shënoi dhe lindjen e demokracisë për popullin Shqiptar.
Gjithsesi, sot pas 29 vitesh, studentët shprehen të zhgënjyer se Shqipëria po i rikthehet një sistemi diktatorial falë qeversisë së Edi Ramës, ku të rinjtë nuk shohin më shpresë për të ardhmen e tyre.
“Më thoni si mundemi ne ta motivojmë një të ri që të studiojë dhe të qëndrojë në Shqipëri, si mund ta motivojmë një të ri të zgjedhë rrugën e drejtë në këtë shtet”, reagoi Shyqyri Mirtollari duke iu drejtuar kryeministrit, prindërve, gjyshërve e të gjithë pjesëmarrësve.
Pjesëmarrësit në protestë u shprehen se rinia shqiptare nuk e pranon dot diçka të tillë dhe se ata do vazhdojnë të bashkohen për të luftuar për të ardhmen e Shqipërisë.
Ndërkohë, Belind Këlliçi, kryetar i Forumit Rinor të PD-së thekson se vendi ndodhet në një emergjencë kombëtare kundrejt plakjes së popullsisë dhe emigrimit masiv për shkak se të rinjtë nuk gjejnë dot kushtet për të plotësuar ambiciet në vendin e tyre.
“Lluksi, paratë dhe korrupsioni i kanë zënë sytë qeverisë aktuale. Kjo është e vërteta e qeverisë por nuk mund të jetë e vërteta e të rinjve. Nuk ka moment më emergjent se ky ku jemi sot. A ka emergjencë më të madhe kombëtare sesa fakti se çdo ditë që kalon të rinjtë largohen nga vendi ynë?”, shprehet zoti Këlliçi.
Ndërkohë, një e re nga Mati konfirmon se sidomos në rrethet e Shqipërisë fenomeni i emigrimit vazhdon masivisht.
“A e dini se familjet matiane arrijnë dhe paguajnë deri në 17 mijë paund për të hipur fëmijët e tyre në kamion e për t’i çuar në Angli, dhe jo për shkollim sigurisht, por për të punuar për bukën e gojës“, tha ajo duke theksuar se mungesa e investimeve, e punësimit dhe e shpresës i ka detyruar familjet matiane të zgjedhin këtë rrugë. “Nëse vazhdojmë me këtë diktaturë që Edi Rama na ka sjellë në Shqipëri, di të them se nuk do kemi më forume rinore por do të kemi forume azilantësh” u shpreh ajo.
Një tjetër student nga Universiteti Luigj Gurakuqi në Shkodër, Elvis Deda, krahason gjendjen e para 29-viteve me atë të sotshme.
“Te gjithë ata të rinj dhe qytetarë shqiptarë 29 vite më parë sakrifikuan që ne të jetojmë të lirë dhe të lumtur. Ata e arritën rrëzimin e bustit të diktatorit. Po a jemi sot më mirë se 29 vite më parë?”, shprehet Elvis Deda.
“Kemi gjithë ata të rinj që në mungesën e një pune apo një të ardhme largohen drejt Europës. Menduam se fituam lirinë 29 vite më parë por në të vërtetë sot na censurohet çdo fjalë“, shton ai.
“Jemi sot këtu për të treguar se jemi opozitarë të së keqes. Sot duhet të hedhim një regjim tjetër shumë shekullor emigracioni“, përfunduan të rinjtë, të vendosur për të shpëtuar të ardhmen e një Shqipërie që tashmë po boshatiset.
