Nexhmije Hoxha, gruaja e diktatorit stalinist të një nga diktaturave më të egra në Europën Lindore, vdiq në Tiranë më 26 Shkurt 2020, pa shprehur kurrë pendesë apo keqardhje për viktimat e shumta të regjimit.
Nexhmije Hoxha, gruaja e ve e diktatorit Enver Hoxha vdiq në moshën 99 vjeçare në Tiranë më 26 Shkurt 2020, njoftoi familja për median.
Hoxha lindi në vitin 1921 me mbiemrin e vajzërisë Xhunglini në atë që është sot Maqedonia e Veriut nga familje shqiptare nga Dibra e Madhe. Familja e saj u zhvendos në Tiranë rreth viteve 1930 bashkë me qindra familje të tjera, që ikën për t’i shpëtuar përndjekjes politike në Mbretërinë Serbo-Kroate-Slovene.
Kur ishte mësuese e re, ajo duket se u bë anëtare e Partisë Fashiste Shqiptare në vitin 1941, sipas një dokumenti të anëtarësisë të zbuluar pas rënies së komunizmit nga studiuesi Kastriot Dervishi. Ajo kaloi në radhët e Partisë Komuniste më vonë dhe u martua me diktatorin e ardhshëm Enver Hoxha në vitin 1945.
Nexhmije Hoxha ishte pjesë e kupolës qeverisëse të diktaturës dhe mbajti për një periudhë të gjatë postin e drejtoreshës në Institutin e Studimeve Marksiste – Leniniste, qendra kryesore e formulimit të politikave në atë kohë.
Ajo është parë nga shumë njerëz si eminenca gri pas valëve të vazhdueshme të spastrimeve politike të kryera nga bashkëshorti i saj, në të cilat disa mijëra shqiptarë, përfshirë edhe shokë fëmijërie të diktatorit apo të afërm të tij, u ekzekutuan apo u burgosën.
Nexhmije Hoxha qëndroi e palëkundur deri në fund, duke i injoruar disa prej vrasjeve si “gabime”.
Gjatë sundimit 45 vjeçar komunist, rreth 6 mijë shqiptarë mendohet se u ekzekutuan dhe dhjetëramijëra të tjerë u burgosën apo u internuan në kushte çnjerëzore. Mijëra prej viktimave kanë mbetur pa varr për shkak të politikës së regjimit për të mos dorëzuar kufomat e të ekzekutuarve në familje.
