Kryetar i Këshillit të Emërimit të Drejtësisë, Ardian Dvorani kundërshtoi në parlament akuzat Presidentit të Republikës, Ilir Meta, i cili pretendon prej disa muajsh shkelje të Kushtetutës nga KED.
Kryetari i KED-së dëshmoi të premten përpara komisionit hetimor për ligjshmërinë vendimeve të Presidentit llir Meta për zgjedhjet dhe emërimet në Gjykatën Kushtetuese, ku mohoi me forcë akuzat e kishte konsumuar shkelje të Kushtetutës, duke deklaruar se 6 ditë vonesë në dorëzimin e listave për emërimet e gjyqtarëve nuk përbëjnë një problem madhor.
“Gjithçka mund të zgjidhet nëse ekziston fryma e bashkëpunimit. Bashkëpunimi është parim i Kushtetutës, por mesa duket askush nuk është i gatshëm të bashkëpunojë”, u shpreh Dvorani gjatë seancës dëgjimore në Kuvend.
Javën e fundit të Shkurtit, në një konferencë për shtyp, Presidenti Ilir Meta ka bërë thirrje publike për një protestë popullore në mbrojtje të Kushtetutës dhe vlerave të demokracisë shqiptare, duke akuzuar qeverinë aktuale dhe KED-në për organizimin e një grushti shteti.
Meta pretendon se Dvorani ka shkelur Kushtetutën pasi nuk ka respektuar afatet për dërgimin në Kuvend dhe Presidencë të vendimeve të KED-së për vakancat në Gjykatën Kushtetuese.
“Po ky Dvorani që s’ka asnjë kompetencë tjetër veç të qenit korrier i vendimeve kolegjiale të KED, përse nuk i nisi të katër vendimet njëherazi edhe Presidentit edhe Kuvendit në një ditë siç vendosi KED? Kush i tha këtij t’ia niste Presidentit të dy vakancat njëherazi dhe Kuvendit t’ia çonte me kokën e tij 6 ditë më vonë,” deklaroi Meta gjatë një konference për shtyp me 25 shkurt.
Bazuar në këto pretendime, komisioni hetimor i Kuvendit të Shqipërisë i cili u mblodh sot, diskutoi mbi shkaqet e diferencës kohore në dërgimin e listave të kandidatëve nga ana e KED-së për plotësimin e vakancave në Gjykatën Kushtetuese dhe nëse kjo vonesë ka ndikuar në një emërim të qëllimshëm të anëtarëve të Gjykatës Kushtetuese.
Më 31 gusht 2019, Presidenti i Republikës së Shqipërisë Ilir Meta, nëpërmjet një shkrese që ka dërguar pranë Kuvendit të Shqipërisë, i ka tërhequr vëmendjen kryetarit të KED-së në lidhje me përzgjedhjen e kandidatëve për plotësimin e vendeve vakante të shpallura nga Gjykata Kushtetuese, duke pretenduar për një kapje të institucionit të KED-së.
Komisioni hetimor i tërhoqi vëmendjen zotit Dvorani duke theksuar se lista e kandidatëve që është dërguar nga Këshilli i Emërimit të Drejtësisë për plotësimin e pozicioneve vakante në Gjykatën Kushtetuese ka pasur 4 kandidatë , duke theksuar vazhdimisht gjatë seancës ligjin që e cilëson numrin total të kandidatëve në 3.
Ndër të tjera, gjatë seancës hetimore që u zhvilluar me zotin Dvorani, u pretendua se mbledhja e KED-së në datën 21.09.2019 nuk është e renditur, dhe gjatë kësaj mbledhje janë referuar 2 vende vakante të presidencës, dhe 2 vende vakante nga Gjykata Kushtetuese të cilat pretendohen të mos jenë publikuar në faqen zyrtare të Gjykatës së Lartë.
“Këto katër vendime janë plotësisht te publikuara”, është shprehur Dvorani, duke rënë ndesh me pretendimet e Presidentit Meta.
Ndërkohë, sipas Dvoranit akuzat e presidentit Meta janë të pabaza dhe nuk gjejnë asnjë referencë ligjore, pasi ka pasur 108 raste të tjera të përzgjedhjes dhe ndër to vetëm ky ka qenë rasti i vetëm ku këshilli ka vepruar në këtë mënyrë.
Seanca dëgjimore u fokusua vazhdimisht në faktin se tejkalimi i numrit të kandidatëve në lista përbën gabimin kryesor të Këshillit të Emërimit të Drejtësisë.
“Ju duhet të dërgoni në lista vetëm ata kandidatë që organet përgjegjëse kanë të drejtë të zgjedhin, dhe jo të tjerët që vijojnë në listë”, deklaroi deputeti Ulsi Manja, kryetari i Komisionit Hetimor të Kuvendit të Shqipërisë.