Vasfije Krasniqi Goodman, një nga të paktat gra që ka treguar hapur se është përdhunuar gjatë luftës në Kosovës, u tha deputetëve në Asamblenë e Kosovës se të mbijetuarit e dhunës seksuale vazhdojnë të stigmatizohen nga shoqëria.
Vasfije Krasniqi Goodman tha një seance speciale të Kuvendit të Kosovës kushtuar ndërgjegjësimit të publikut për të mbijetuarit e dhunës seksuale gjatë kohës së luftës të hënën se viktimave u nevojitej mbrojtje dhe mbështetje, por, përkundrazi, ata janë stigmatizuar nga shoqëria për më shumë se dy dekada.
“Vendi ynë, shoqëria jonë na stigmatizon”, tha Krasniqi Goodman.
“Ku ishit ju 21 vjet më parë? Ishit fshehur në papafingo ndërsa gruaja përdhunohej? Ku e gjetët guximin për ta braktisur? ” tha ajo.
“Ku janë djemtë që e dëuan nga shtëpia nënën e tyre pasi ajo u përdhunuan? Ata e mbajtën bashkëshorten e tyre, sepse nuk e dinin që edhe ajo ishte përdhunuar. Ku ishit kur u përdhunua Jeta, një shtatëvjeçare? Dhe çfarë po bëni ju tani për të na e lehtësuar këtë? E gjithë shoqëria kosovare duhet të ketë turp, ju që na viktimizoni çdo ditë”, vazhdoi ajo.
Krasniqi Goodman është një nga të paktat viktima të dhunës seksuale të luftës në Kosovë që ka folur publikisht se si ajo u përdhunua nga policët serbë gjatë luftës, kur ajo ishte 16 vjeçe. Dy ish-policë serbë u liruan nga akuzat për përdhunimin e saj nga Gjykata Supreme e Kosovës në vitin 2014.
Vitin e kaluar Krasniqi Goodman dëshmoi gjithashtu në Komitetin e Punëve të Jashtme të Dhomës së Përfaqësuesve të SHBA-së se Uashingtoni duhet të bëjë më shumë për ta mbajtur Serbinë përgjegjëse për krimet e kohës së luftës, përfshirë përdhunimet.
Ajo u tha ligjvënësve në Kuvendin e Kosovës të hënën se kishte ardhur koha që gratë të merrnin drejtësinë që asaj i ishte mohuar.
“Duhet të ndryshoni sepse ne jemi lodhur. Nuk ju falim për atë që na keni bërë ne këto 20 vitet e fundit”, tha ajo.
Në hapje të seancës speciale, kryetarja e Kuvendit, Vjosa Osmani, foli për “gabimin e pafalshëm” të “mosveprimit, paragjykimit, stigmës dhe mosbesimit” që çon në heshtjen e të mbijetuarve të dhunës seksuale.
“Grave në Kosovë, të cilat i janë nënshtruar një dhune të egër nga aparati gjenocidal i shtetit serb, u është mohuar e drejta për të dëshmuar për këto krime, si për shkak të stigmatizimit ashtu edhe për shkak të mungesës së një drejtësie efikase”, tha Osmani.
Deputetja Saranda Bogjuevci nga partia qeverisëse Vetëvendosja propozoi që të ketë një ditë përkujtimore për viktimat e dhunës seksuale në Kosovë.
“Drejtësia është tepër e rëndësishme për të mbijetuarit dhe njohja e vuajtjeve të tyre është drejtësi”, tha Bogujevci.
Ajo sugjeroi që “14 prilli, data kur u përdhunua Vasfije, duhet të jetë data kur ne të kujtojmë viktimat e dhunës seksuale në Kosovë”.
Edhe kryeministri Albin Kurti foli në seancë, duke thënë se rastet që përfshijnë dhunë seksuale të kohës së luftës duhet të trajtohen me seriozitetin maksimal.
“Përdhunimi gjatë luftës është mizoria më e keqe që ka ndodhur, por nuk është diskutuar kurrë gjatë bisedimeve për normalizimin e marrëdhënieve me Serbinë”, tha Kurti.
“Pa ndëshkimin e krimeve të luftës, ne nuk mund të kemi paqe”, shtoi ai.
