Fluturimi i fundit nga Tirana në Romë u nis mëngjesin e të Martës ndërsa Italia urdhëroi ndalim qarkullimi në të gjithë territorin e vendit me synimin për të kufizuar apo ngadalësuar shpërndarjen e koronavirusit.
Numri i rasteve të konfirmuara me koronavirusin e ri arriti në gjashtë mbrëmjen e së Dielës pasi tre familjarë të pacientëve të parë të identifikuar dhe një tjetër i ardhur nga Italia së fundmi, u identifikuan si bartës, bëri të ditur Ministria e Shëndetësisë, duke e çuar numrin e përgjithshëm të të prekurve në gjashtë.
Sipas Ministrisë, të gjithë pacientët janë në gjendje të mirë shëndetësore dhe pa komplikime.
“Nga rezultatet e 14 testimeve të kryera në laboratorin e virologjisë në Institutin e Shëndetit Publik, rezulton se 4 persona kanë rezultuar pozitiv për COVID-19, 3 prej të cilëve persona të familjes me 2 rastet e para që u konfirmuan mbrëmjen e djeshme. Aktualisht të gjithë personat e tyre të kontaktit po mbahen në vetëkarantinim të detyruar dhe po ndiqen nga ekipet e epidemiologëve për gjendjen e tyre shëndetësore,” njoftoi ministria. “Aktualisht gjendja e tyre rezulton pa probleme të veçanta,” shtoi ajo.
Ndërkohë, qeveria e Italisë urdhëroi një ndalim të përgjithshëm të qarkullimit në të gjithë territorin e vendit duke hedhur një hap tjetër në protokollet e Organizatës Botërore të Shëndetësisë, të cilat synojnë kufizimin apo ngadalësimin e përhapjes së virusit përmes masave të karantinimit masiv të popullsisë. Kompania ajrore AlItalia kreu fluturimin e fundit nga Roma në Tiranë dhe anasjelltas mëngjesin e së Martës ndërsa udhëtimet e pasdites u anuluan.
Shqipëria pezulloi të Hënën fluturimet me Italinë e veriut duke lënë fillimisht katër linja të hapura me Italinë qendrore dhe të jugut, por situata u përkeqësua me shpejtësi deri në anulimin e të gjitha linjave sot.
Në Tiranë, një pjesë e popullsisë reagoi e frikësuar duke kryer blerje në sasi të pazakonta të ushqimeve nëpër dyqane apo supermarkete por në tërësi dyqanet duken të furnizuara për të përballuar kërkesën e pazakontë.
Ekonomia në telashe
Bursat në të gjithë botën reaguan të tronditura nga perspektiva e paralizës ekonomike që mund të prekë segmente të rëndësishme të ekonomisë botërore dhe që mund të zgjasë për javë apo muaj me rradhë.
Të hënën, disa nga bursat më të mëdha të botës vunë në punë mekanizmin e ndalimit të përkohshëm të tregtimit, një mekanizëm antipanik që është përdorur vetëm në rast krizash ekstreme. Mekanizmi pezullon tregtinë e aksioneve përkohësisht në rast se çmimi i aksioneve bie mesatarisht me 7% dhe ndalimi bëhet për t’i dhënë kohë tregtarëve të arsyetojnë me gjakftohtësi përmasat e krizës dhe efektet që ajo mund të ketë në ekonomi. Të Hënën, bursa e Nju Jorkut u pezullua tre herë për këtë shkak. Mëngjesin e së Martës, bursat në Azi dhe Europë përjetuan një ringritje duke rikuperuar një pjesë të vogël të humbjeve të pësuara të Hënën.
