Kryeministri njoftoi se një pjesë e administratës e cila punon në kompjutera do të punonte nga shtëpia, ndërsa bëri me dije masa shtesë për mjediset publike, përfshi mbyllej të palestrave, diskove dhe pub-ve.
Pas njoftimit të 10 rasteve me Covid-19, qeveria njoftoi përshkallëzimin e masave për të ndaluar përhapjen e virusit. Kryeministri Edi Rama njoftoi të martën se një pjesë e mirë e administratës, e cila kishte punë me kompjutera do të punonte nga shtëpia, ndërsa qytetarët i ftoi të kryenin aplikkimet online.
Rama po ashtu tha se ishte miratuar leje për prindërit që kishin fëmijë në sistemin parashkollorë apo shkollat fillore, të cilat janë mbyllur tashmë, dhe pagesë ekstra me rreth 1 mijë euro në muaj për mjekët e infermierët dhe 500 euro për sanitarët që do ndihmojën në përballimin e situatës.
“Gjërat sipas skenarit do të shkojnë në një kurbë rritje, sipas llogarive nga OBSH që shohin si sillet virusi dhe cilat janë masat. Dhe gjatë kurbës rritëse do të rriten edhe kufizimet”, tha kryeministri, duke paralajmëruar masa shtesë, ndërsa shtoi se ata që nuk respektonin kufizimet e vendosura do të ndëshkoheshin me gjoba.
Gjatë mbledhjes së qeverisë po ashtu u bë me dije se do merreshin masa për shpërndarjen e pensioneve në shtëpi pa kosto shtesë për të moshuarit, që janë ftuar të mos dalin në rrugë. Po ashtu u bë më dije pezullimi i të gjitha konkurseve publike.
Duke iu referuar virusit si armik, kryeministri tha se duhej ta shihnim situatën si një “gjendje lufte”, ndërsa tha se kontrollet mjekësore duhej të planifikoheshin paraprakisht dhe askush nuk duhej të shkonte në spital pa pasur më herët planifikim.
Më herët gjatë ditës Këshilli i Lartë Gjyqësorë dhe Prokuroria e Përgjithshme njoftuan kufizime të punës së tyre. Kufizime të punës dhe leje për punëtoret kanë njoftuar edhe institucione të tjera të administratës.
Akuza dhe kundërakuza politike
Nga ana tjetër Rama dhe kreu i opozitës Lulzim Basha shkëmbyen sulme në distancë si zakonisht. Opozita akuzoi qeverinë se nuk kishte marrë masat e duhura dhe se kishte sjellë në vend 1.2 milion maska të skaduara.
Rama u përgjigj duke vendosur vetë një prej maskave, ndërsa tha se ato nuk do të përdoreshin nga mjekët që kishin kontakte me virusin apo në salla të operacioneve. Ndërsa akuzoi opozitën për përhapje paniku ndërsa tha se edhe kur vendi ishte në situatë të jashtëzakonshme ata “s’ndalen së kërkuari pushtet me shpifje,sherr,rrëmujë!”.
Basha replikoi se Rama po akuzonte opozitën, ndërsa nuk kishte marrë masa dhe se mjekët ishin pajisur me maska të skaduara, duke i vënë këta në rrezik. Opozita po ashtu njoftoi më herët ngritjen e një grupi pune për situatën.
Kryeministri bëri deklarata bashkimi duke kërkuar që ekspertët të opozitës të bashkohëshin me ata të qeverisë, ndërsa tha se kishte kohë për të bërë akuzat. “Nëse ka akuza, ju lutem mblidhini të gjitha, dhe plasini kur të ketë ikur armiku nga këtu”, tha Rama.