Një 73 vjeçare me histori udhëtimi nga Italia dhe e trajtuar për pneumoni, u nda nga jeta mesditën e sotme në qytetin rajonal të Durrësit, duke shënuar viktimën e parë të lidhur me koronavirusin e ri në vendin tonë.
Ministria e Shëndetësisë njoftoi ndarjen nga jeta të një pacienteje 73 vjeçare të trajtuar për sëmundje kardiake dhe pulmonare dhe që i konfirmua si rast i prekur nga koronavirusi i ri së fundmi.
“Pacientja 73 vjeçare e konfirmuar me COVID-19 ka ndërruar jetë pak minuta më parë nga komplikacionet e rënda, si pasojë e disa sëmundjeve bashkëshoqëruese kardiake dhe pulmonare,” njoftoi Ministria në një mesazh dërguar medias por të papublikuar në faqen e vet zyrtare.
“73-vjecarja vuante nga sëmundje të tjera bashkëshoqëruese: Insuficience kardiake kronike, SPOK, Nyha III, Fibrilation atrial, hypertyreisis, tatus post by pass,” shtohet në njoftim.
Kjo paciente ishte një nga 12 rastet e konfirmuara me koronavirusin e ri në Shqipëri dhe kishte histori udhëtimi nga Italia, vendi më i prekur në kontinent nga kjo sëmundje dhe u mjekua në spitalin rajonal të Durrësit.
Shqipëria gjendet prej ditës së Hënë në situatë emergjence shëndetësore për shkak të virusit me origjinë shtazore që u përhap fillimisht në qytetin Vuhan në Kinën qendrore dhe ka prekur deri më sot mbi 113000 persona duke shkaktuar 4 mijë të vdekur. Numri i rasteve është rritur me mbi 4 mijë brenda 24 orëve nga data 9 në datën 10 Mars.
