Për të ngadalësuar përhapjen e koronavirusit, disa vende të Ballkanit kanë mbyllur pjesën më të madhe të pikave të tyre kufitare me shtetet fqinje, duke e bërë udhëtimin në disa pjesë të rajonit praktikisht të pamundur.
Serbia, Shqipëria dhe Rumania kanë mbyllur shumë prej pikave kufitare për të luftuar përhapjen e koronavirusit.
Të gjitha vendet e rajonit kanë ndaluar hyrjen ose kanë prezantuar masa speciale kufizuese për pasagjerët që vijnë nga vendet me rrezik mesatar ose të lartë nga koronavirusi.
Serbia ka mbyllur 44 pika kufitare me Rumaninë, Bullgarinë, Maqedoninë e Veriut, Malin e Zi, Bosnjën dhe Kroacinë, në mënyrë që policia e saj kufitare të mund të përqendrohet në pikat kufitare më kryesore dhe më të përdorura. Kalimet janë mbyllur kryesisht për të rritur numrin e stafit në pikat kryesore që mbeten të hapura. Shumica e kufijve të mbyllur janë pika kufitare rrugore, por ndikohet edhe transporti lumor, hekurudhor dhe ai me traget.
Rumania ka mbyllur disa pika kalimi që lidhin vendin me fqinjët e saj. Mbylljet prekin pikat kufitare për në Hungari, Ukrainë, Bullgari dhe Moldavi, njoftoi ministri i brendshëm, Marcel Vela, të enjten. Ai tha gjithashtu se autoritetet serbe kishin mbyllur në mënyrë të njëanshme disa pika kalimi, me sa duket, pa njoftuar së pari Rumaninë.
Shqipëria ka mbyllur në mënyrë të njëanshme disa pika kufitare me Malin e Zi, Kosovën dhe Maqedoninë e Veriut.
Maqedonia e Veriut nuk ka mbyllur asnjë kufi deri më tani, por, si rezultat i lëvizjeve të njëanshme të bëra nga fqinjët e saj, dy pikat kufitare me Serbinë dhe tre me Shqipërinë janë mbyllur. Qarkullimi për në Serbi vazhdon vetëm përmes pikës kufitare kryesore të Tabanovces.
Bosnja dhe Hercegovina nuk ka mbyllur asnjë prej kufijve të saj, edhe pse masat e kontrollit të pasagjerëve janë forcuar dhe një ndalim i përkohshëm i hyrjes është vendosur për të mbërriturit nga vendet më të prekura nga pandemia e koronavirusit.
Kroacia gjithashtu nuk i ka mbyllur kufijtë e saj, madje edhe me Italinë, vendi më i prekur nga Europa. Një seancë qeveritare të premten pritej të sqaronte nëse pikat kufitare do të mbesin të hapura apo jo.
Në Malin e Zi, pika kufitare me Shqipërinë në Sukobin-Muriqan u mbyll të premten në mëngjes me kërkesë të Shqipërisë. Pikat kufitare me Serbinë në Jabuka afër Pljevljas dhe në Godovo afër Rozajes u mbyllën të enjten me kërkesë të Serbisë.
Moldavia nuk i ka mbyllur pikat kufitare, por fqinjët e saj, Ukraina dhe Rumania, kanë mbyllur disa pika kufitare, duke e bërë udhëtimin atje më të vështirë. Bullgaria gjithashtu nuk ka mbyllur asnjë pikë kufitare, përveç atyre të mbyllura nga pala serbe.
