Në deklaratën e së Hënës, kreu i OBSH-së kërkoi nga shtetet anëtare të përshkallëzojnë testimet për të identifikuar rastet e infektimeve, por përsëriti gjithashtu këshillën e mëparshme që ky institucion jep mbi kë duhet të testohet dhe në çfarë rrethanash.
Organizata Botërore e Shëndetësisë bëri thirrje të Hënën që shtetet anëtare të shtojnë numrin e testimeve të personave të dyshuar për infektim me COVID-19 ndërsa shtoi se qëndrimi i kësaj organizate vijon të jetë që testimeve duhet t’i nënshtrohen vetëm personat që tregojnë shenja dhe që kanë pasur kontakt me persona të infektuar deri dy ditë para se të dallohej infektimi.
Drejtori i Përgjithshëm i OBSH-së, Tedros Adhanom Ghebreyesus bëri thirrje për më shumë testime në konferencën për shtyp që mbajti në Gjenevë.
“Ne kemi një mesazh të thjeshtë për të gjitha vendet: testoni, testoni, testoni”, deklaroi ai.
“Testoni çdo rast të dyshuar,” shtoi ai.
Sipas OBSH-së autoritetet duhet të gjejnë kontaktet e ngushta të personave të konfirmuar me COVID deri dy ditë para zhvillimit të simptomave dhe të testojnë të gjitha këto raste. Por OBSH përsëriti qëndrimin e saj të mëparshëm që testimet do të duhet të bëhen vetëm për personat që kanë qenë në kontakt me rastet e konfirmuara vetëm në rast se këto persona kontakti shfaqin simptoma të COVID-19.
Vende të ndryshme të botës janë aktualisht në dilemë për mënyrën e administrimit të testeve. Koreja e Jugut po shihet si një rast pozitiv në menaxhimin e COVID-19 pasi ia doli që, përmes ligjeve të jashtëzakonshme, të shrytëzonte të dhënat personale të personave të prekur për të zgjeruar sa më shumë numrin e personave të kontaktit, duke rritur numrin e analizave në rreth 220 mijë persona për të identifikuar rreth 8 mijë të infektuar. Numri i lartë i analizave besohet se ndihmoi qeverinë e këtij vendi të kufizojë hapësirën e përhapjes së virusit duke mbajtur një numër të vogël personash në regjim izolimi. Aktualisht në Korenë e Jugut janë në gjendje izolimi rreth 29 mijë persona të cilët vlerësohet se kanë pasur kontakte me të infektuarit, por nuk ka zona të tëra të bllokuara. Kjo lloj metode i ka mundësuar vendit që, ndërsa shpenzon shuma të mëdha parash për të kryer 220 mijë testime për identifikimin e 8 mijë rasteve, arrin të mbajë në punë pjesën tjetër të ekonomisë.
Ndryshe nga Koreja e Jugut, Italia dhe vende të tjera kanë zgjedhur të bllokojnë qarkullimin në pjesë të mëdha të territorit dhe të fusin të gjithë popullsinë në karantinë me shpresë se në këtë mënyrë do të ndalojë përhapjen e virusit. [Lexo më shumë këtë analizë të Reuters në gjuhën angleze]
Shqipëria ka zhvilluar deri më sot 563 raste të dyshuara për të identifikuar 51 raste sipas të dhënave të mesditës së të Hënës.
Deklarata e OBSH-së për rritjen e numrit të testimeve u shoqërua me thirrje në Tiranë për ta ndjekur këtë porosi. Ylli Manjani, një ish-ministër i qeverisë Rama-Meta, deklaroi se qeveria duhet të bëjë testime në masë në të gjithë vendin.
Kjo nuk është saktësisht ajo që OBSH rekomandon. Testimi për COVID-19 rekomandohet vetëm për dy raste: e para, rastet kur ka simptoma për një sëmundje të tillë dhe simptomat duhet të vlerësohen nga një mjek; dhe e dyta, rastet kur personi ka pasur kontakt me persona të prekur. Procesi i analizimit të materjalit të marrë nga një person është shumë i komplikuar dhe aplikimi i testimit mbi, fjala vjen, të gjithë popullsinë, është jopraktik dhe i pamenaxhueshëm nga autoritetet. Për këtë arsye, këshilla e OBSH-së të Hënën ishte rritja e numrit të testimeve, por jo testime rastësore në popullsi.
OBSH ka shpërndarë deri më sot nëpër botë rreth 1.5 milionë teste në 120 vende dhe po punon për të rritur disponueshmërinë e testeve për vendet më në nevojë.
OBSH këshillon që të gjitha rastet e konfirmuara, përfshirë edhe ato që janë të lehta, të izolohen në mjedise të kujdesit shëndetësor me qëllim që të shmangen infektimet e mëtejshme dhe të ofrohet kujdesi i nevojshëm. Por Tedros Adhanom Ghebreyesus shtoi në konferencë se është i vetëdijshëm se shtrimi në spital i të gjitha rasteve është jopraktik dhe përtej kapaciteteve të shumë vendeve.
Në këtë rast OBSH rekomandon se personat që izolohen në shtëpi t’i nënshtrohen një regjimi strikt të ndarjes nga familjarët e tjerë. Kështu, personat e prekur duhet të qëndrojnë në dhomë më vete, të kontaktohen nga familjarët vetëm në rastet kur familjarët kanë maska si dhe të përdorin tualete të ndryshme. Gjithashtu, personat që kujdesen për të sëmurë me COVID-19 në kushtet e shtëpisë duhet të jenë me shëndet të plotë dhe pa sëmundje të tjera për të mos rrezikuar raste të rënda.
Masat e kujdesit kundër infektimit duhet të vijojnë për së paku dy javë pas shërimit të personit të sëmurë me COVID-19 për shkak se infektimet mund të vijojnë edhe pasi shenjat e sëmundjes zhduken.
