Inspektoriati Shtetëror i Shëndetit njoftoi se do të kontrollojë kushtet e punës dhe higjenës në minierat e Bulqizës. Një pjesë e minierave ndërkohë ka njoftuar pezullimin e aktivitetit pas situatës së krijuar nga Covid-19.
Një pjesë e bizneseve që kontrollojnë galeri në zonën krommbajtëse të Bulqizës njoftuan të dielën dhe të hënën se kishin ndaluar aktivitetin për shkak të situatës së krijuar nga Covid-19, ndërsa Inspektoriati Shtetëror i Shëndetësisë bëri me dije se do të ushtronte kontroll në galeritë e hapura, përfshi atë të kompanisë Albchrome, që është më e madhja në zonë.
“Grupi do të shkojë në Bulqizë, për të bërë kontrollin e kushteve sanitare. Dhe se si zbatohet vendimi i ministres së shëndetësisë. Pas inspektimit, mund të dalim me një qëndrim”, tha Vjollca Braho, drejtuese e Inspektoriatit.
Ajo po ashtu tha se për këtë pjesë të industrisë nuk kishte pasur deri tani udhëzime nga Ministria e Shëndetësisë për të ndaluar punën.
Ndërkohë më herët të dielën pas njoftimit të dhjetra rasteve me virusin Covid-19, një pjesë e subjekteve minerare që operojnë në zonën e Bulqizës dhe Martaneshit, kanë vendosur të pezullojnë punën. BIRN mësoi se pjesa më e madhe e subjekteve minerare në Martanesh, zona e dytë më e madhe mineralmbajtëse në Bulqizë, kanë ndërprerë punën, përveç personelit që merret me ruajtjen fizike dhe me repartet e mirëmbajtjes.
Edhe në Bulqizë, një pjesë e subjekteve minerare, që operojnë në zonë mineralmbajtëse të parë dhe ajo D, kanë pezulluar punën. Eltjon Deda, administratori i dy subjekteve minerare në zonën e Bulqizës, në një njoftim të bërë publik në profilin e tij në Facebook, lajmëroi se do të pezullohej puna, si masë mbrojtëse për minatorët. “Duke parë situatën kaotike të krijuar, por dhe si një masë parandaluese për përhapjen e virusit COVID-19, ju bëj me dije se, duke filluar nga dita e hënë, datë 16. 03. 2020, subjektet minerare Kevger shpk, Isaku shpk dhe Grupi Trans shpk, pezullojnë aktivitetin e tyre për një periudhë të pacaktuar” shkruan Deda. Me një vendim të tillë, kanë dalë edhe disa subjekte të tjera.
Gjithashtu ka pasur edhe disa kompani të tjera, që kanë lajmëruar minatorët se puna do të vazhdojë normalisht.
Ndër to edhe kompania më e madhe e nxjerrjes së kromit në Bulqizë, Albchrome. Në një kominikim me BIRN dy ditë më parë kompania tha se ka marrë masat e nevojshme kundër Covid-19, ndërsa tha se puna në minierë nuk mund të mbyllej dhe se gjithmonë duhej të kishte gadishmëri. “Deri më tani nuk raportohet asnjë punonjës në minerën e AlbChrome në Bulqizë me COVID-19, ndërkohë që janë marrë një sërë masash për të ulur përhapjen e COVID-19”, tha kompania. Ajo shtoi se ishte në kontakt me institucionet dhe se do të vepronte sipas udhëzimeve të tyre.
Por Sindikata e Minatorëve të Bashkuar të Bulqizës, ka kërkuar ndërprerje të punës në të gjitha subjektet minerare, duke akuzuar se nuk kishte kushte të higjenës. Sindikata po ashtu u bëri thirrje minatorëve që të bojkotonin punën.
“Janë disa reparte shumë të rëndësishme në minierë që nomalisht nuk mund ta ndërpresin punën, flas këtu për pusin. Ndërsa punëtorët, rasti i Albchrome që kalojnë mbi 600 duhet ta pezullojnë punën në një situatë të tillë. Vetëm në ashensor hypin afro 10-12 persona, ngjitur me njëri-tjetrin”, tha për BIRN kreu i sindikatës Elton Debreshi. SMBB edhe më parë ka bërë me dije se, kompanitë minerare dhe institucionet nuk kanë marrë masat që kërkon situata me virusin Covid-19.
Drejtuesja e ISHSH Braho tha se subjektet minerare nuk kishin qenë objekt inspektimi deri sëfundmi. “Ne në këtë periudhë kemi qenë në terren për të parë nëse janë mbyllur kafenet, restorantet, baret dhe nëse janë zbatuar urdhërat e ministres, të kryeministrit, aktet normative dhe të gjitha”, tha ajo, ndërsa shtoi se inspektimet në Bulqizë do të kryheshin të martën. “Ne nuk kemi kaluar deri tek minierat. Kjo pasi ishim të zënë me marketet, furrat e bukës që janë më jetike dhe të përditshme”, tha Braho.
Nga situata e Covid-19 në Shqipëri janë identifikuar pozitivë 51 persona, pjesa më e madhe e të cilëve në kryeqytet.
