Një 66-vjeçar nga Lushnja, i cili ndodhej prej ditësh në respirim të drejtuar në spitalin Infektiv humbi jetën mëngjesin e së mërkurës. Sipas Ministrisë së Shëndetësisë, pacienti vuante nga sëmundje të tjera shoqëruese.
Një 66-vjeçar nga Lushnja humbi jetën në spitalin Infektiv në Tiranë mëngjesin e së mërkurës, duke shënuar viktimën e dytë nga koronavirusi në Shqipëri. Sipas Ministrisë së Shëndetësisë, 66-vjeçari ishte prej ditësh në gjendje të rëndë dhe në respirim të drejtuar.
“Pacienti vuante nga disa sëmundje shoqëruese; insuficenca kardiake, edemë pulmonare dhe insuficencë renale,” tha Ministria përmes një deklarate.
Viktima e parë nga COVID-19 u shënua me 11 mars në spitalin rajonal të Durrësit, ku një 73-vjeçare humbi jetën pas komplikacioneve të rënda. Pacientja vuante edhe nga sëmundje shoqëruese pulmonare dhe kardiake.
Të martën, numri i të infektuarve të konfirmuar në Shqipëri shkoi në 55, ku nëntë raste ose 16% e totalit janë personel mjekësor. Mes mjekëve dhe infermierëve të infektuar, tetë raste janë shënuar në spitalin “Shefqet Ndroqi” në Tiranë dhe një rast në spitalin rajonal të Durrësit. Nga 55 personat e infektuar, 25 ndodhen në trajtim mjekësor në Spitalin Infektiv në Tiranë. Të martën, Ministria e Shëndetësisë vendosi që të hapë edhe sanatoriumin “Shefqet Ndroqi” për të sëmurët me COVID-19.
Mes testeve të kryera, numri më i madh i të infektuarve është shënuar në Tiranë me 38 raste, i ndjekur nga Fieri me 6 raste. Në Durrës numri ka qëndruar i njëjtë prej ditësh me 5 raste, njësoj si në Elbasan, Lushnje dhe Rrogozhinë ku janë identifikuar nga dy persona të infektuar.
Silva Bino nga Instituti i Shëndetit Publik deklaroi të martën se Shqipëria po vazhdon të ndjekë strategjinë e gjurmimit të të infektuarve dhe izolimit të kontakteve të tyre për të thyer zinxhirin e përhapjes së sëmundjes.
“Këtu do të përqendrohet e gjithë puna jonë dhe e armatës së mjekëve,” tha Bino, duke u bërë thirrje qytetarëve që të vazhdojnë të telefonojnë në numrin e Urgjencës 127 për të mos mbingarkuar spitalet në dispozicion të të sëmurëve.
