Zv.ministrja e Shëndetësisë, Mira Rakacolli tha të premten se nga 35 testime të kryera në 24 orët e fundit, 6 kishin rezultuar pozitivë. Në Tiranë, bilanci i të prekurve rritet në 50.
Gjashtë raste të reja me COVID-19 u konfirmuan në Shqipëri mëngjesin e së premtes, duke e çuar numrin total të të prekurve në 70. Zv.ministrja e Shëndetësisë, Mira Rakacolli tha në një deklaratë për mediat se Instituti i Shëndetit Publik kishte kryer 35 testime të reja në 24 orët e fundit, nga të cilët 6 kishin rezultuar pozitivë.
Testimet e reja e rritën bilancin e të prekurve në Tiranë në 50 raste. Qyteti i dytë me numrin më të lartë të të prekurve është Fieri me shtatë raste, ndërsa situata nuk ka ndryshuar në pesë qytetet e tjera.
Zv.ministrja Rakacolli tha se 35 pacientë me COVID-19 ndodhen tashmë të shtruar në spitalin Infektiv në Tiranë, tre prej të cilëve ndodhen në terapi intensive. Ajo shtoi se gjendja e të shtruarve është e qëndrueshme dhe asnjëri prej të prekurve nuk është nën respirim të drejtuar.
Shqipëria u fut zyrtarisht më 9 mars në hartën e vendeve të prekura nga koronavirusi i ri, COVID-19 dhe prej asaj kohe, dy pacientë kanë humbur betejën me sëmundjen. Viktimat janë një 73-vjeçare nga Durrësi e infektuar në Itali dhe një 66-vjeçar nga Lushnja –i cili dyshohet se u infektua në spitalin “Shefqet Ndroqi” në Tiranë pas vizitës së një të afërmi që kishte qenë në Itali.
Prej 11 ditësh, Shqipëria po aplikon masa të rrepta të kufizimit të lëvizjes për të mundësuar distancimin social si mënyra e vetme për frenimin e përhapjes së koronavirusit. Të premten, Ministria e Shëndetësisë përsëriti apelin për qytetarët që të respektojnë rregullat në fuqi.
“Qytetarët të respektojnë masat e distancimit social, të vazhdojnë të qëndrojnë në shtëpi. Ndihmoni të tjerët dhe stafet mjekësore duke qëndruar vetë të parët në shtëpi,” tha zv.ministrja Mira Rakacolli.
Ministria e Shëndetësisë po vazhdon të testojë rastet e dyshuara për të ndërprerë zinxhirin e infektimit, pavarësisht debatit për numrin e vogël të testimeve ditore. Numri total i testeve të kryera prej janarit është 732.
Ministria ka vendosur gjithashtu në dispozicion të qytetarëve një linjë të dytë të gjelbër 0800 40 40 për t’u ardhur në ndihmë atyre apo pacientëve me sëmundje kronike për t’u informuar në lidhje me COVID-19 apo sëmundje të tjera.
Ky numër është i ndarë nga numri 127 i Urgjencës Kombëtare, ku duhet të telefonojnë qytetarët që shfaqin shenja të sëmundjes COVID-19.
