Numri i personave të infektuar në COVID-19 ka arritur në 197 të shtunën, ndërsa 2 pacientë kanë humbur jetën gjatë 24 orëve të fundit në Spitalin Infektiv në QSUT.
Bilanci i personave të infektuar me COVID-19 në Shqipëri është rritur me 11 raste gjatë 24 orëve të fundit, duke regjistruar në total 197 persona të prekur që nga fillimi i epidemisë. Ndërkohë, dy pacientë kanë humbur jetën duke e çuar numrin total të viktimave si pasojë e koronavirusit të ri në 10.
“Në terren vazhdon puna me të gjithë epidemiologët dhe punonjësit e shëndetit publik, duke i gjurmuar rastet, duke identifikuar kontaktet e tyre, duke i testuar një pjesë të tyre dhe duke i sjellë mostrat në Institutin e Shëndetit Publik,” tha gjatë një deklarate për shtyp, Silva Bino nga ISHP.
“Në 24 orët e fundit janë raportuar 74 persona të ri të dyshuar, për të cilët për 11 prej tyre ka rezultuar COVID pozitiv,” shtoi ajo.
Viktimat e regjistruara gjatë 24 orëve të fundit janë një burrë 67-vjeç nga Tirana dhe një grua 72-vjeçare nga Vlora.
Nga personat e prekur me COVID-19, 74 janë të shtruar në shërbimin infektiv të Qendrës Spitalore Universitare Nënë Tereza në Tiranë, ndërsa të tjerët ndiqen në kushtet e vetëizolimit në shtëpi. Katër prej pacientëve në QSUT janë në gjendje kritike për jetën.
Numri i testeve të bëra nga ISHP për raste të dyshuara ose të mundshme ka arritur në 1245.
Qyteti më i prekur nga koronavirusi është Tirana, me 113 pacientë të infektuar, i ndjekur nga Fieri, Korça, Durrësi, Elbasani, Kavaja dhe Lezha. Deri të dielën 33 pacientë me COVID-19 janë shëruar, përfshirë 6 punonjës së sistemit shëndetësorë të prekur nga virusi.
