Numri i të prekurve nga koronavirusi i ri COVID-19 ka arritur në 223, pas konfirmimit të 11 rasteve të reja në 24 orët e fundit, ndërkohë një pacient 79-vjeçar ka humbur jetën mëngjesin e të hënës.
Nëpërmjet komunikimit të përditshëm me median, drejtoresha e Institutit të Shëndetit Publik, Albana Fico njoftoi të hënën se gjatë 24 orëve të fundit janë testuar 90 persona të dyshuar, prej të cilëve janë konfirmuar 11 raste pozitive me COVID-19.
“Epidemiologët nga veriu në jug janë duke bërë një punë të jashtëzakonshme për evidentimin e kontakteve pas konfirmimit të rasteve të dyshuara,” tha Fico.
Sipas Ficos deri ditën e hënë nga ISHP janë testuar në të gjithë vendin 1521 raste të dyshuara dhe numri i personave të prekur nga COVID-19 ka arritur në 223.
Mëngjesin e së hënës në Spitalin Infektiv COVID-1 në QSUT ka humbur jetën një pacient 79-vjeçar nga Tirana i konfirmuar me koronavirusin e ri, duke e çuar numrin e viktimave nga COVID-19 në 11.
Në shërbimin infektiv ndodhen aktualisht 74 pacientë të shtruar me COVID-19 – 7 janë në terapi intensive nga të cilët 4 janë të intubuar. Ndërkohë në spitalin COVID-2 “Shefqet Ndroqi” ndodhet një pacient i shtruar.
