Dy pacientë kanë humbur jetën me COVID-19 në 24 orët e fundit ndërsa janë evidentuar dhe 16 raste të reja në të gjithë vendin.
Numri i personave të prekur nga COVID-19 ka arritur në 259 të mërkurën në Shqipëri, ndërsa vetëm gjatë 24 orëve të fundit 2 persona kanë humbur jetën në Spitalin Infektiv në Qendrën Spitalore Universitare Nënë Tereza, duke e çuar numrin total të viktimave në 15.
Deri të mërkurën numri i personave të testuar në të gjithë vendin ka arritur në 1823. Sipas Institutit të Shëndetit Publik në 24 orët e fundit epidemia është zgjeruar në qytet e Tiranës, Durrësit dhe Fierit.
Mosha mesatare e viktimave të shkaktuara nga sëmundja COVID-19 është 66-vjeç, ndërkohë mosha mesatare e pacientëve të infektuar nga koronavirusi është 50 vjeç.
Në shërbimin Infektiv të Qendrës Spitalore Universitare Nënë Tereza janë të shtruar 79 pacientë, nga të cilët 7 janë në terapi intensive dhe 4 të intubuar në gjendje kritike për jetën.
Gjatë 24 orëve të fundit janë shëruar nga COVID-19 15 pacientë, duke e çuar numrin total të pacientëve të shëruar në 67.
