Numri i pacientëve të infektuar nga koronavirusi i ri SARS-CoV-2 ka arritur në 277, ndërsa një i moshuar nga Durrësi ka humbur jetën si pasojë i sëmundjes COVID-19.
Mëngjesin e të enjtes ka ndërruar jetë një pacient 78-vjeç nga Durrësi, i cili kishte tre ditë i intubuar në Spitalin Infektiv në QSUT, ndërkohë Instituti i Shëndetit Publik njoftoi se vazhdon puna për indentifikimn e rasteve të reja.
“Vazhdon puna në terren nga njësitë vendore të kujdesit shëndetësor për identifikimin e rasteve të reja me COVID-19 dhe për ndjekjen e kontakteve të tyre,” tha Rovena Daja nga Instituti i Shëndetit Publik.
“Epidemiologët e njësive vendorë të kujdesit shëndetësorë nga veriu ën jug të vendit janë duke ndjekur të gjithë kontaktet e rasteve pozitive,” shtoi ajo.
Në 24 orët e fundit janë testuar në laboratorin e virologjisë të Institutit të Shëndetit Publik 96 pacientë, nga të cilët 18 kanë rezultuar pozitiv me COVID-19.
Në total, që nga fillimi i epidemisë ISHP ka testuar 1919 raste të dyshuara për COVID-19, nga të cilat 277 kanë rezultuar pozitivë. Mosha mesatare e të prekurve është 50 vjeç. Nga raste pozitive të indentifikuara nga ISHP 8 janë fëmijë.
Numri i personave të shëruar në 24 orët e fundit është rritur me 9 pacientë duke arritur në 76 që nga fillimi i epidemisë. ISHP bëri me dije gjithashtu se 9 personel shëndetësor të testuar gjatë 24 orëve të fundit kanë rezultuar negativ.
Në shërbimin Infektiv në QSUT aktualisht ndodhen 81 pacientë të shtruar, nga të cilët 8 janë në terapi intensive, ndërsa 4 janë të intubuar. Ndërkohë në spitalin Shefqet Ndroqi ndodhet i shtruar një pacient.
