Në Ditën Ndërkombëtare të Romëve, Këshilli i Europës dhe Komisioni Europian denoncojnë gjuhën e urrejtjes dhe u bëjnë thirrje qeverive që të marrin masa urgjente për mbrojtjen e këtij komuniteti nga pandemia e COVID-19.
Në Ditën Ndërkombëtare të Romëve më 8 prill, Këshilli i Europës dhe Komisioni Europian u bënë thirrje të gjitha qeverive të Europës që të angazhohen për të lehtësuar sfidat e shumta të këtij komuniteti gjatë krizës së pandemisë së COVID-19.
Komisionerja për të Drejtat e Njeriut në Këshillin e Europës, Dunja Mijatoviç tha përmes një deklarate për mediat se komuniteti rom është ndër grupet më të prekshme ndaj pandemisë, ndërsa theksoi se nevoja për të përmirësuar kushtet e tyre duhet të jetë edhe më emergjente.
“Çdo vit me rastin e Ditës Ndërkombëtare të Romëve, qeverive u kujtohet nevoja për të përmirësuar kushtet e jetesës së shumë romëve të varfëruar dhe të margjinalizuar në Evropë, si dhe forcimi i masave për të luftuar diskriminimin me të cilin përballen ata,” tha Mijatoviç.
Komisionerja Mijatoviç shprehu shqetësimin për retorikën diskriminuese dhe rritjen e gjuhës së urrejtjes, që ka shenjestruar komunitetin rom në kuadër të pandemisë së COVID-19.
“Në Bullgari, politikanët dhe disa media u janë referuar romëve si një kërcënim për shëndetin publik dhe kanë kërkuar marrjen e masave speciale kundrejt tyre. Autoritetet vendore kanë ngritur pika të kontrollit policor rreth vendbanimeve rome për zbatimin e karantinës dhe, në një vend, kanë ngritur një gardh rreth një vendbanimi rom për të kontrolluar më mirë lëvizjet,” denoncoi ajo.
8 Prilli u shpall Dita Ndërkombëtare e Romëve tre dekada më parë, gjatë Kongresit të 4-t Botëror të Romëve të mbajtur në Mbretërinë e Bashkuar. Ajo ka për synim celebrimin e kulturës, historisë dhe gjuhës së komunitetit rom si dhe për të rritur ndërgjegjësimin dhe vëmendjen ndaj problemeve të këtij komuniteti.
Ndonëse situata e komuniteteve rome në Europë vazhdon të jetë problematike, viti 2020 u ka shtuar atyre probleme të reja të shkaktuara nga kriza e COVID-19.
Shumica e familjeve rome jetojnë në banesa të vogla dhe të varfra, ku distancimi fizik është pothuajse i pamundur. Ata vazhdojnë të privohen gjithashtu nga aksesi në ujë të pastër dhe kanalizime, duke vështirësuar gjithashtu zbatimin e rregullave të higjienës.
Një tjetër problem është diskriminimi dhe mungesa e qasjes në sistemin shëndetësor.
“Jam e shqetësuar nga masat e miratuara nga disa vende europiane, të cilat mund te kompromentojnë të drejtat e romëve dhe pengimin e qasjes së tyre të barabartë në ofrimin e shërbimeve themelore publike, më e rëndësishmja e kujdesit shëndetësor,” tha sekretarja e Përgjithshme e Këshillit të Europës, Marija Pejčinović Burić.
Në Ditën Ndërkombëtare të Romëve, Komisioni Europian bëri thirrje për më shumë solidaritet me komunitetin rom.
“Duhet të bëhen përpjekje më të mëdha për t’u siguruar që romët të përfshihen në shoqëri dhe që ata të kenë qasje të barabartë me nevojat themelore,” tha komisionerja për barazinë, Helena Dalli.
“Mënyra e vetme për të kapërcyer krizën është duke punuar së bashku. Evropianët duhet t’i qëndrojnë njëri-tjetrit pranë në këto kohë. Nëse mund të ketë ndonjë gjë më ngjitëse se një virus, është solidariteti ynë,” përfundoi ajo.
