Ndërsa numri i viktimave u rrit në 23 persona, trendi i përhapjes së koronavirusit të ri në Shqipëri është në rënie për të disatën ditë radhazi.
Kurba e përhapjes së koronavirusit të ri COVID-19 është për të disatën ditë në rënie në Shqipëri, ndërsa Instituti i Shëndetit Publik deklaroi të premten se 7 raste të reja ishin zbuluar në 24 orët e fundit.
“Deri në këto momente janë testuar 3385 raste të dyshuara me COVID-19, nga të cilët kanë rezultuar pozitivë 416 raste,” tha Marjeta Dervishi nga ISHP në një deklaratë për mediat.
Një paciente 72-vjeçare nga Tirana humbi betejën me sëmundjen pasditen e së enjtes, duke e çuar numrin e viktimave nga COVID-19 në Shqipëri në 23. Sipas Ministrisë së Shëndetësisë, e ndjera vuante nga disa sëmundje bashkëshoqëruese, si insuficensa renale, hipertensioni dhe hipotiroidizmi.
Numri i pacientëve që po trajtohen aktualisht në dy spitalet e vendosura në dispozicion të pacientëve të infektuar është ulur në 56. Në Shërbimin Infektiv ndodhen 50 persona të shtruar, ndërsa në spitalin COVID 2 ndodhen 6 pacientë të tjerë. Në të dy spitalet ndodhen në gjendje më të rëndë dhe të intubuar pesë persona të infektuar nga koronavirusi i ri.
Rastet e reja të zbuluara në 24 orët e fundit ndahen mes Tiranës dhe Shkodrës, duke e zgjeruar vatrën e infeksionit në të dy qytetet.
Tirana numëron aktualisht 199 raste të identifikuara me COVID-19 ose 47.8% të totalit, e ndjekur nga Shkodra me 49 raste ose 11.7%. Qyteti i tretë me numrin më të madh të rasteve është Durrësi me 38 persona të infektuar, por zinxhiri i transmetimit në këtë qytet duket se është ndërprerë prej ditësh.
Sipas ISHP-së, 17 pacientë i janë shtuar listës së të shëruarve nga COVID-19 në 24 orët e fundit në Shqipëri. Numri total i të shëruarve është rritur në 182 ose 43% e të gjitha rasteve të identifikuara në vend që prej fillimit të epidemisë.
