Policia e Shtetit ka gjobitur 2071 qytetarë të cilët lëviznin pa arsye, ndërsa dhjetra të tjerë janë penalizuar për shkelje të ndryshme. Një shef i policisë rrugore në Vlorë u pezullua nga detyra pasi po luante futboll në orarin e ndaluar.
Policia e Shtetit njoftoi se mijëra qytetarë thyen rregullat e karantinës gjatë javës së kaluar, mes të cilëve edhe shefi i policisë rrugore në Vlorë, i cili është pezulluar nga detyra. Sipas të dhënave të raportuara nga Policia, nga e diela e kaluar më 6 prill janë penalizuar me nga 10 mijë lekë gjobë 2071 qytetarë, pasi janë konstatuar të lëviznin në këmbë ose me biçikleta pa ndonjë arsye. Gjithashtu, janë gjobitur me nga 20 mijë lekë dhe u janë bllokuar automjetet për tre muaj 13 qytetarëve, pasi kanë qëndruar në parqe jashtë orareve të lejuara.
Gjatë së njëjtës periudhë, Policia ka identifikuar 4 persona që kanë shkelur karantinën e detyrueshme, duke i ndëshkuar ata me 700 mijë lekë gjobë secili.
Mes personave që kanë thyer orarin e karantinës ka qenë edhe Shefi i Seksionit të Qarkullimit Rrugor në Vlorë, i cili ishte duke luajtur futboll në një kalçeto në pyllin e Sodës së bashku me nëntë persona të tjerë. Shefi i qarkullimit është pezulluar nga detyra, ndërsa të 10 personat janë ndëshkuar duke u karantinuar për 14 ditë.
Gjashtë persona janë arrestuar dhe dy të tjerë janë proceduar për kundërshtim të punonjësve të policisë. Të premten u arrestua edhe një person i kërkuar, Orgest Bilbili nga Lushnja, i cili, pasi refuzoi të tregonte lejen e dalies kundërshtoi një punonjës policie dhe i drejtoi armën duke e kërcënuar se do ta vriste.
Sipas të dhënave të raportuara nga policia, gjatë kësaj jave ka pasur rritje të numrit të qytetarëve që nuk respektojnë oraret kufizuese të përcaktuara nga qeveria. Gjatë shtatë ditëve të fundit, 39 tregtarë e administratorë lokalesh janë konstatuar duke ushtruar aktivitetin e tyre jashtë orarit të lejuar dhe janë gjobitur nga policia. Katër lokale janë konstatuar në shkelje të masave në mënyrë të përsëritur dhe është vendosur mbyllja e aktivitetit të tyre për një periudhë 6-mujore, ndërsa një bukëpjekës është proceduar penalisht, pasi nuk i është bindur urdhrit për mos-ushtrim të aktivitetit.
Policia ka ndëshkuar edhe 291 drejtues mjetesh për shkelje të urdhërit të ndalim qarkullimit; ka proceduar penalisht 8 të tjerë për drejtim të parregullt të mjetit e në gjendje të dehur dhe 6 persona janë arrestuar pasi drejtonin mjete motorrike pa leje drejtimi.
