Vatra e infeksionit zgjerohet në Shkodër, Tiranë dhe Krujë dhe shtrihet për herë të parë edhe në bashkinë e Kurbinit me 2 raste pozitive të COVID-19.
Numri i rasteve të reja me COVID-19 vazhdon të qëndrojë në kuota të larta për të tretën ditë radhazi në Shqipëri, ndërsa listës së të prekurve iu shtuan edhe 21 persona të tjerë të premten. Drejtoresha e Institutit të Shëndetit Publik, Albana Fico tha në një deklaratë për mediat se në 24 orët e fundit ishin testuar 253 persona të dyshuar, nga të cilët 21 rezultuan pozitivë.
Kjo e çoi numrin total të të prekurve nga COVID-19 në Shqipëri në 539, nga të cilët 26 pacientë e kanë humbur tashmë betejën me sëmundjen.
Numri më i lartë i rasteve të reja u shënua sërish në Shkodër me 11 persona të prekur, ndërsa harta e infeksionit u zgjerua me bashkinë e Kurbinit dhe shtrihet tashmë në 20 qytete të vendit.
Mes personave të prekur, 43 janë aktualisht duke marrë trajtim mjekësor në dy spitalet e vendosura në dispozicion të pacientëve me COVID-19. Shtatë pacientë gjenden në terapi intensive në spitalin Infektiv në Tiranë, ndërsa 4 ndodhen në gjendje më të rëndë dhe të intubuar në spitalin e mushkërive “Shefqet Ndoqi”.
Tirana mbetet vatra më e madhe e infeksionit në Shqipëri me 4 raste të reja në 24 orët e fundit dhe 245 raste gjithsej. Numri i të prekurve është rritur sërish në qytetin e Shkodrës ku numri i të prekurve ka arritur në 94.
Katër raste të tjera me COVID-19 janë identifikuar në qytetin e Krujës, ndërsa për herë të parë, listës i është shtuar edhe bashkia e Kurbinit me 2 raste.
Gjatë 24 orëve të fundit, 6 pacientë i janë shtuar listës së të shëruarve duke e çuar numrin total të të shëruarve në 283 persona. Të shëruarit në Shqipëri përbëjnë 52% të numrit total të të prekurve nga COVID-19.