Gjysma e rasteve të reja u zbulua në qytetin e Krujës, ndërkohë që vatra e infeksionit u zgjerua edhe në Tiranë dhe në Shkodër.
Shqipëria shënoi edhe 14 raste të reja me COVID-19 të dielën, duke e çuar numrin total të personave të prekur në 562. Marjeta Dervishi nga Instituti i Shëndetit Publik tha se në 24 orët e fundit ishin testuar 231 persona të dyshuar, mes të cilëve edhe 35 mjekë dhe infermierë.
Numri më i lartë i rasteve të reja u zbulua në qytetin e Krujës, ku 7 persona rezultuan pozitivë. Pesë raste i përkasin Tiranës dhe 2 rastet e tjera Shkodrës. Në Shkodër, njëri prej personave të prekur ishte personel shëndetësor.
Devishi nga ISHP tha se deri më tani në Shqipëri, 10% e të gjithë të testuarve kanë rezultuar pozitivë me COVID-19. “Shifra tregon një kontroll të mirë të epidemisë si dhe faktin se numri i testimeve ka qenë i mjaftueshëm,” tha ajo.
ISHP numëron aktualisht 222 persona të infektuar aktivë dhe 314 të shëruar. Ndërkohë, 43 pacientë ndodhen të shtruar në dy qendrat spitalore të vendosura në dispozicion të COVID-19, njëmbëdhjetë prej të cilëve janë në terapi intensive.