Pas zbulimit të rasteve të para në Krujë dhe Kurbin pak ditë më parë, Instituti i Shëndetit Publik bëri të ditur se nga 22 rastet e reja të shënuara gjatë 24 orëve të fundit, 17 u gjetën në këto dy zona.
Numri i pacientëve me sëmundjen COVID-19 u shtua me 22 vetë në Shqipëri gjatë 24 orëve të fundit, nga të cilët, 12 u identifikuan në Kurbin, 5 në Krujë, 3 në Shkodër dhe 2 në Tiranë. Numri i lartë i rasteve të krujë dhe Kurbin lidhet me identifikimin për herë të parë të vatrave të infeksionit në këto qytete pak ditë më parë.
Pavarësisht kësaj, Eugena Tomini nga Instituti i Shëndetit Publik deklaroi se kurba e infeksionit në Shqipëri është e qëndrueshme tashmë që prej një jave.
Gjatë 24 orëve të fundit autoritetet kryen 233 testime të reja ndërsa numri i pacientëve të shëruar arriti në 327 vetë ose 57% e të gjithë të sëmurëve. Afro 7% e personave aktualisht të sëmurë po trajtohen në regjim spitalor ndërsa pjesa tjetër po trajtohen në shtëpi.
Sipas llogaritjes së Ministrisë së Shëndetësisë, në Shqipëri ka pasur deri tani 26 vdekje me një shkallë vdekshmërie prej 5%. Në llogaritë e ministrisë nuk përfshihen edhe tre pacientë të tjerë të konfirmuar me COVID-19 që janë ndarë nga jeta, por që sipas ministrisë, shkaku i vdekjeve nuk lidhet me koronavirusin e ri.
Aktualisht shqetësimi kryesor lidhet me një vatër infeksioni të zbuluar mes punonjësve të një fabrike fasonerie në Krujë. Qeveria vendosi që në fillim të pandemisë të mos mbyllë fabrikat, megjithëse pjesa më e madhe e tyre u mbyll, qoftë për shkak të mungesës së punës, qoftë për shkak të frikës së punonjësve dhe drejtuesve për të vajtur në punë. Por një pjesë e këtyre fabrikave vijuan punën, duke u bërë një rrezik potencial.
