Për të disatën ditë me radhë, qyteti i Krujës dhe zona e Kurbinit janë zonat që kanë pjesën dërrmuese të rasteve të reja me COVID-19 ndërsa ISHP thotë se në 24 orët e fundit në Tiranë, për herë të parë që nga fillimi i pandemisë, nuk u shënuan raste të reja.
Instituti i Shëndetit Publik identifikoi 25 pacientë të rinj me COVID-19 gjatë 24 orëve të fundit nga të cilët, 17 ishin në Krujë dhe 8 në Kurbin. Kruja është bërë një qendër e madhe e pacientëve me CODID-19 gjatë ditëve të fundit. Gjatë 24 orëve të fundit, qyteti i vogël me 17 mijë banorë shënoi 17 raste të reja ndërsa një ditë më parë kishte shënuar 5 raste. Deri më sot, në Krujë ka 40 raste COVID-19 duke e bërë atë qytetin e katërt më të prekur pas Tiranës, Shkodrës, e Durrësit.
Sipas Institutit të Shëndetit Publik, në Krujë dhe në Kurbin vijon hetimi epidemiologjik i cili nisi pas identifikimit të një pacienteje punonjëse në fabrikë fason. Qeveria shqiptare urdhëroi dyqanet e vogla të mbylleshin në muajin Mars, por refuzoi të mbyllë fabrikat për shkak të pasojave ekonomike.
ISHP deklaroi gjithashtu se gjatë 24 orëve të fundit, në Tiranë nuk u shënua asnjë rast i ri i COVID-19, gjë që ndodh për herë të parë.
Ndonëse numri i rasteve aktive në Shqipëri u rrit gjatë 24 orëve të fundit, numri i personave të trajtuar në kujdes spitalor duket se është në rënie.
Në total në Shqipëri ka pasur deri më sot 609 raste me COVID-19 nga të cilët, 345 janë shëruar dhe 26 persona kanë humbur jetën.