Disa sindikata dhe organizata i bënë thirrje qeverisë të marrë masa të rrepta për të mbrojtur punëtorët e fabrikave nga rreziku i infektimeve me koronavirusin e ri, pasi një fabrikë fason në Krujë u bë gjatë ditëve të fundit një vatër e madhe e përhapjes së sëmundjes COVID-19.
Një numër sindikatash dhe organizatash të shoqërisë civile bënë thirrje për një komunikim më të gjerë mes punëdhënësve, punëmarrësve dhe qeverisë për të trajtuar problemet ekonomike të shkaktuara nga pandemia e koronavirusit të ri, si dhe për të gjetur me mirëkuptim zgjidhjet e mundshme.
Sindikatat sugjerojnë që punëdhënësit dhe punëmarrësit të arrijnë një kompromis për pagesë të pagave të pjesshme gjatë periudhës së bllokimit të punës si dhe nxisin qeverinë të mbulojë një pjesë të kostove të biznesit për të mundësuar vijimin e jetës sa më normalisht të jetë e mundur. Sindikatat sugjerojnë gjithashtu që punëdhënësit dhe punëmarrësit të arrijnë një kompromis për të kompensuar një pjesë të humbjeve të shkaktuar nga pandemia përmes zëvendësimit të disa ditëve të humbura me një pjesë të ditëve pushim gjatë muajve pas kapërcimit të pandemisë.
“Punëdhënësit dhe qeveria, në çdo nivel, të konsultohen paraprakisht dhe të arrijnë marrëveshje me sindikatat përfaqësuese të punëmarrësve për masat që duhen ndërmarrë për shkak të Covid 19. Marrëveshjet e tilla, bazuar në një dialog efektiv punëdhënës punëmarrës,kanë potencialin për të adresuar më mirë problemet reale me të cilat përballen punëtorët dhe kompanitë,” thuhet në deklaratën e përbashkët të publikuar në Facebook. [Link]
“…ne besojmë se parimi i humanizmit dhe respektimit të dinjitetit njerëzor të sanksionuar në Kushtetutën e Republikës së Shqipërisë, konventat ndërkombëtare të ratifikuara nga Republika e Shqipërisë, direktivat e Bashkimit Evropian ku dëshirojmë të integrohemi, duhet të mbizotërojë në çdo nismë të ndërmarrë nga qeveria shqiptare, punëdhënësit dhe punëmarrësit në kushtet e gjendjes së fatkeqësisë natyrore ku ndodhemi dhe që kërkon angazhimin dhe sakrificën e secilit prej nesh,” shkruhet në deklaratë.
“Të gjitha përpjekjet duhet të ndërmerren për të ndihmuar punëtorët, ndërmarrjet, aktivitetet ekonomike dhe shërbimet publike për të mbijetuar nga kriza, kështu që ata do të jenë në gjendje të kthehen në aktivitetet e tyre kur të përfundojë kriza, të ruajnë vendet e punës dhe të mbrojnë punëtorët nga papunësia dhe humbja e të ardhurave,” vijon më tej deklarata.
Aktualisht qeveria shqiptare ka ndërmarrë dy paketa ndihme që kanë shënjestruar biznesin e vogël dhe të papunët e krijuar nga pandemia përmes pagesave të drejtpërdrejta nga buxheti ndërsa për biznesin e madh është sugjeruar mbështetja me kredi për të shlyer pagat e punonjësve, gjë që duket se nuk është materjalizuar.
Shqipëria pritet të humbasë rreth 5% të prodhimit të vet bruto të vitit 2020 si pasojë e paralizimit të shkaktuar nga pandemia, por ekonomia pritet të rimëkëmbet me një rritje në masën 8% vitin e ardhshëm dhe 6% në vitin 2022. Megjithatë, rreziku është i lartë që një pjesë e bizneseve të mos arrijnë të mbijetojnë gjatë pandemisë, gjë që mund të pengojë rimëkëmbjen ekonomike në periudhën pas saj.