Sipas Qendrës për të Drejtat e Punës gjatë viti 2019 ndërtimi, minierat dhe fasoneritë ishin sektorët më të rrezikshëm të ekonomisë për punëtorët, duke shënjuar numrin më të lartë të aksidenteve dhe viktimave .
Data 28 prill, shënon Ditën Botërore për Sigurinë dhe Shëndetin në Punë. Me rastin e kësaj dite Qendra për të Drejtat e Punës (CLR) në Shqipëri, ka bërë publik bilancin e frikshëm të aksidenteve dhe viktimave në ambientin e punës gjatë vitit që lamë pas,
Vetëm në vitin 2019, 176 punëtorë u aksidentuan në ambientet e punës, ndërsa 38 aksidente të tjera kanë rezultuar në raste fatale që kanë përfunduar në humbjen e jetës.
Edison Hoxha, drejtor ekzekutiv i Qendrës për të Drejtat në Punë u shpreh se këto shifra janë siguruar nga Inspektoriati i Punës dhe sektorët më të rrezikshëm për punëtorët janë industria e ndërtimit, minierave dhe fasonerive.
“Sidomos gjatë vitit 2019, ndërtimi ka qenë edhe sektori më problematik për sa i përket rasteve fatale të aksidenteve”, u shpreh Hoxha.
“Rastet me pasoja fatale si ato të rënieve nga lartësia së fundmi janë shtuar dhe kanë rezultuar më problematiket”, vijoi ai, duke shtuar se shkak kryesor mbetet moszbatimi i standardeve të sigurisë.
Mesatarja vjetore e aksidenteve në ambientet e punës në Shqipëri luhatet midis 150-200 të aksidentuarve dhe viktima ka në të gjitha qarqet e Shqipërisë.
Lexo më shumë:
Qendra për të Drejtat e Punës është një organizatë jofitimiprurëse që punon së bashku me punëmarrësit, sindikatat, këshillat e sigurisë e shëndetit, dhe shoqërinë civile në mënyrë që të sigurojë struktura të qëndrueshme dhe solide të marrëdhënieve dhe kushteve të punës në Shqipëri.
“Në këtë ditë të shënuar, ne bëjmë thirrje për më shumë respektim të dispozitave ligjore për sigurinë dhe shëndetin në punë nga ana e punëdhënësve, për të përmbushur detyrimin e tyre dhe pajisjen e punëmarrësve me mjetet mbrojtëse individuale dhe kolektive,” deklaroi organizata nëpërmjet një njoftimi për shtyp.
Sipas kësaj organizate punëmarrësit duhet të ndërgjegjësohen gjithashtu për rëndësinë e pajimeve mbrojtëse individuale dhe për të denoncuar pranë Inspektoriatit Shtetëror të Punës punëdhënësit të cilët nuk u garantojnë vende të sigurta dhe të denja pune.
Drejtori i Qendrës për të Drejtat e Punës, Edison Hoxha tregon se përveç industrisë së ndërtimit edhe minierat kanë pasur problematika për sa i përket sigurisë së shëndetit në punë ndër vite.
“Duhet të dimë se përveç kompanisë kryesore AlbChrome të minierave, ka shumë kompani të tjera më të vogla që kanë me qindra punonjës, por që për shkak të informalitetit , problemet e punonjësve të tyre mbeten të paraportuara,” tha Hoxha.
Lexo më shumë:
Ai gjithashtu pranoi se një tjetër sektor që ndan problematika është ai i fasonerive, po Hoxha nënvizoi se monitorimi i këtij sektori është i vështirë.
“Punëtorët në fasoneri ekspozohen ndaj kimikateve të ndryshme, por ato mendojnë se sëmundjet që u shfaqen mund të jenë për shkaqe të tjera personale, dhe jo prej kushteve të punës,” tha Hoxha, duke sqaruar se për shkak të mungesës së kontrolleve shëndetësore të vazhdueshme në këto industri është e pamundur të monitorohen standardet e sigurisë.
Krahas ndërtimit, minierave, e fasonerive, që sjellin kryesisht dëmtime fizike në punë, ka edhe sektorë të tjerë të cilët sjellin pasoja psikologjike që në dukje nuk vihen re.
“Call Center-at janë një sektor tjetër që me kalimin e kohës shkaktojnë nivele të mëdha stresi tek punonjësit, por këto pasoja janë afat-gjata dhe nuk vërehen direkt, e për më tepër nuk kemi as mënyra monitorimi për këtë,” shpjegoi Hoxha.
Pavarësisht mbrojtjes që mund të vijë nga institucionet monitoruese dhe ligji, Qendra për të Drejtat e Punës cilëson se mbrojtja më e mirë për punëtoret është organizimi kolektiv dhe ndërgjegjësimi i punonjësve për denoncimin e rasteve të abuzimit.
“Inspektoriatet nuk mund të jenë vazhdimisht aty për të monitoruar punën në çdo moment, por ngritja e mekanizmave të brendshme në këto grupe pune do e ndihmonte më shumë punën e inspektoriateve në përmirësimin e kushteve të punës,” theksoi Hoxha.
Në lidhje me situatën e pandemisë gjatë muajve të fundit dhe mënyrën se si kjo do të ndikojë në sigurimin e kushteve të punës, Hoxha tha se bizneset po punojnë me kapacitet të përgjysmuar, që sipas tij ka ndikuar në uljen e aksidenteve.
“Kompanitë tashmë janë duke punuar me kapacitet të përgjysmuar, prandaj në këto kushte garantimi i standarteve të sigurisë është më i thjeshtë,” tha ai.
“Mbetet për t’u parë si do të përballohet sfida e sigurisë në kushtet kur të gjithë punëtorët do të rikthehen në punë,” përfundoi Hoxha.
