Një 73-vjeçar nga Durrësi dhe një 52 vjeçar nga Kruja humbën betejën me sëmundjen, duke e çuar numrin total të viktimave të COVID-19 në Shqipëri në 30.
Koronavirusi i ri, COVID-19 shkaktoi dy viktima të tjera në Shqipëri në 24 orët e fundit si dhe 14 të infektuar të rinj në vatrat e Tiranës, Krujës dhe Shkodrës. Drejtoresha e Institutit të Shëndetit Publik, Albana Fico deklaroi të martën se nga 267 teste të kryera, 14 rezultuan pozitive.
Bilanci i fataliteteve u rëndua pas vdekjes së një 73-vjeçari nga Durrësi në spitalin “Shefqet Ndroqi” mbrëmjen e së hënës dhe një 52-vjeçari nga Kruja në spitalin Infektiv në Tiranë mëngjesin e së martës. Që prej fillimit të epidemisë, 30 persona kanë humbur jetën si pasojë e COVID-19 në Shqipëri ose 4% e të gjithë personave të prekur.
Harta e infeksionit u zgjerua në Tiranë me 7 raste, në Krujë me 5 raste dhe në qytetin e Shkodrës me dy raste –duke e çuar numrin total të të prekurve në 750 persona. Rreth 57% e totalit ose 431 persona janë shëruar tashmë, ndërsa numri i të prekurve aktivë është 290 ose 38% e totalit.
Numri i pacientëve të COVID-19 që po trajtohen në dy spitalet e vendosura në dispozicion të epidemisë ishte 32 mëngjesin e së martës. 27 prej tyre ndodhen në spitalin Infektiv, ndërsa 5 të tjerë në spitalin e mushkërive “Shefqet Ndroqi”.
Pesë prej pacientëve të COVID-19 janë në terapi intensive, dy prej të cilëve në gjendje të rënduar shëndetësore dhe të intubuar.
Ndryshe nga komunikimet e mëparshme, Instituti i Shëndetit Publik renditi të martën numrin e të shëruarve për çdo qytet në vend të numrit total të të prekurve. Tirana dhe Shkodra, dy vatrat më të mëdha të COVID-19 në Shqipëri numërojnë gjithashtu numrin më të lartë të personave që e kanë fituar tashmë betejën me sëmundjen.
Drejtoresha e ISHP-së, Albana Fico përsëriti apelin për respektimin e masave të distancimit social dhe ato të higjienës nga qytetarët, pavarësisht lehtësimit të masave të marra kundër përhapjes së epidemisë. Sipas Ficos, situata e epidemisë është nën kontroll pavarësisht luhatjes së rasteve të reja ditore.