Shqipëria numëron 782 persona të prekur nga koronavirusi i ri dhe 263 pacientë aktivë; 12% e të cilëve ndodhen aktualisht të shtruar në spital.
Shqipëria numëroi 9 raste të reja me COVID-19 të premten dhe 782 persona të prekur që prej fillimit të epidemisë së kroronavirusit të ri në Shqipëri. Rastet e reja u zbuluan mes 245 testimeve të kryera nga Instituti i Shëndetit Publik në 24 orët e fundit.
Rovena Daja nga ISHP deklaroi se pesë nga rastet e reja janë shënuar në Tiranë dhe 4 rastet e tjera në bashkinë e Krujës.
Të premten, në Shqipëri ishin 488 persona të shëruar nga virusi dhe 263 pacientë aktivë. Mes të prekurve aktivë, 33 persona ose 12.5% e totalit ndodhen të shtruar në spital. Sipas Dajës, 7 prej pacientëve të shtruar në spitalin Infektiv dhe në spitalin e mushkërive “Shefqet Ndroqi” janë në gjendje më të rëndë dhe në terapi intensive.
“Situata epidemiologjike paraqitet e qëndrueshme,” tha Daja, duke paralajmëruar shtimin e zonave të gjelbërta edhe në ato bashki ku personat e prekur janë tashmë të shëruar. “Masat e marra bënë të mundur që sistemi shëndetësor të mos mbingarkohet dhe personat e prekur të marrin trajtimin e duhur nga stafi shëndetësor,” shtoi ajo.
Qeveria shqiptare paralajmëroi një lehtësim të mëtejshëm të masave kundër përhapjes së epidemisë së COVID-19 përgjatë majit. Në këto kushte, Ministria e Shëndetësisë apelon të gjithë qytetarët që zbatojnë me rigorozitet masat e distancimit social dhe ato të higjienës personale.
