Shqipëria numëroi 8 raste të reja nga 140 persona të testuar për koronavirus gjatë 24 orëve të fundit, por mes këtyre rasteve të reja u shënua rasti i parë në Durrës që nga 13 Prill dhe dy raste të reja në Elbasan, të parat që nga 22 Prilli.
Shqipëria numëroi vetëm 8 raste të reja me koronavirus gjatë 24 orëve të fundit por tre nga këto raste i përkasin dy qyteteve që nuk kanë parë raste të reja prej shumë ditësh. Paralelisht me numrin e vogël të rasteve pozitive, numri i testimeve të rasteve të dyshuara ishte vetëm 140, shifra më e ulët e shënuar në më shumë se një muaj.
Shqipëria ka shënuar nivele të ulëta të rasteve të reja të koronavirusit që nga e Enjtja e kaluar ndërsa autoritetet shëndetësore kanë dhënë leje për lehtësimin e masave kufizuese në lëvizjen e qytetarëve dhe në aktivitet ekonomik për të ashtuquajturën fazë të dytë të pandemisë, në të cilën, virusi pritet të vijojë të qarkullojë por në nivele të ulëta dhe pa rrezikuar kolaps shëndetësor për shkak se qytetarët do të jenë të vetëdijshëm për shkallën e rrezikut dhe do të tregojnë kujdes që të mbrohen.
Deri më tani numri i të infektuarve në Shqipëri është 803 persona, ndërsa nga këta, 574 persona janë shëruar dhe 31 kanë vdekur. Numri i rasteve aktive të Hënën ishte 229, numri më i ulët që nga 17 Prilli ndërsa numri i pacientëve nën kujdes spitalor është 34, pothuajse i pandryshuar që prej dy javësh.
