Me 12 raste të reja dhe 206 pacientë aktivë, Shqipëria numëron aktualisht 10 bashki ku infeksioni SARS-CoV-2 është ende i pranishëm ose vazhdon të përhapet mes personave.
Shqipëria shënoi edhe 12 raste të reja me COVID-19 të mërkurën, ndërsa numri total i të prekurve shkoi në 832 persona. Sipas zv.ministres së Shëndetësisë, Mira Rakacolli, rastet e reja pozitive u zbuluan mes 255 testimeve të kryera në 24 orët e fundit.
Tre prej rasteve të reja i përkasin qarkut të Fierit, 3 në Krujë dhe tre rastet e tjera u identifikuan në vatrën e re të Bashkisë së Kamzës. Infeksioni SARS-CoV-2 vazhdoi të përhapej në Shkodër me 2 raste dhe në Tiranë me 1 rast të ri.
Që prej fillimit të epidemisë janë shëruar 595 persona, ndërsa 206 persona të prekur konsiderohen pacientë aktivë. Prej tyre, 36 pacientë ndodhen aktualisht të shtruar në dy spitalet e vendosura në dispozicion të COVID-19, tetë prej të cilëve janë në terapi intensive.
Të mërkurën, Shqipëria numëroi 10 vatra aktive të infeksionit SARS-CoV-2 të kryesuara nga Tirana me 98 persona të prekur. Kruja qëndron në vendin e dytë me 69 pacientë aktivë, e ndjekur nga Shkodra me 16 pacientë aktivë dhe bashkia e Kamzës me 6 pacientë aktivë.
Vatra aktive konsiderohen edhe Kurbini me 4 raste, Elbasani dhe Fieri me nga 3 raste, Mirdita dhe Berati me nga 2 raste dhe Durrësi me 1 rast.
Pandemia e COVID-19 ka shkaktuar 31 viktima në Shqipëri. Numri më i madh i viktimave është regjistruar në Tiranë, ku 18 persona humbën jetën, e ndjekur nga Durrësi me 6 viktima dhe Fieri me 3 viktima.
Zv.ministrja e Shëndetësisë, Mira Rakacolli deklaroi të mërkurën se përhapja e infeksionit SARS-CoV-2 po monitorohet nga të gjitha strukturat shëndetësore në Shqipëri. Ajo shtoi gjithashtu se është rritur vigjilenca për gjurmimin e rasteve të dyshuara dhe testimin e tyre.
