Rastet e reja u zbuluan nga testimet e kryera në Tiranë, Krujë, Shkodër dhe Kamëz, ndërkohë që 71% e të prekurve në Shqipëri janë tashmë të shëruar.
Koronavirusi i ri SARS-CoV-2 vazhdon të përhapet në Tiranë, Krujë dhe Shkodër –qytete të cilat kanë edhe numrin më të lartë të të prekurve në Shqipëri. Raste të reja u shënuan të enjten edhe në vatrën e zbuluar së fundmi në bashkinë e Kamzës.
Sipas Rovena Dajës nga Instituti i Shëndetit Publik, në 24 orët e fundit janë kryer 275 testime në të gjithë vendin, nga të cilat 10 persona rezultuan pozitivë. Në Tiranë dhe Krujë u konfirmuan nga 3 raste të reja, ndërsa në Shkodër dhe Kamëz nga dy raste.
Rastet e reja e çuan numrin total të të prekurve në 842 të enjten, ndërkohë që 605 prej tyre ose 71% rezultojnë tashmë të shëruar. Aktualisht, 206 persona konsiderohen aktivë me COVID-19, pjesa më e madhe e të cilëve janë asimptomatikë.
Në shërbimin Infektiv dhe në spitalin “Shefqet Ndroqi” ndodhen të shtruar dhe nën kujdes mjekësor 38 pacientë ose 18% e të prekurve aktivë. Shtatë prej pacientëve ndodhen aktualisht në terapi intensive.
Që prej fillimit të epidemisë, 31 persona kanë humbur betejën me sëmundjen në të dy spitalet. Numri më i madh i viktimave të COVID-19 është shënuar në Tiranë, e ndjekur nga Durrësi dhe Fieri.