Në përpjekje për të përmirësuar konkurrencën midis klubeve, federatat e basketbollit të Kosovës dhe Shqipërisë po diskutojnë rreth bashkimit në një ligë të vetme.
Elvira Dushku, sekretare e përgjithshme e Federatës së Basketbollit të Kosovës, tha të martën se organet drejtuese të basketbollit në Prishtinë dhe Tiranë po diskutojnë idetë për një shkrirje të mundshme të ligës.
“Për shumë vite, kemi diskutuar krijimin e një kampionati të përbashkët në takimet tona, por diskutimet intensive kanë filluar që nga viti i kaluar”, tha Dushku.
Muajin e kaluar, kreu i Federatës Shqiptare të Basketbollit, Avni Ponari u tha mediave shqiptare se modelet për një ligë të unifikuar po merren parasysh.
Në prill, federatat e basketbollit të Kosovës dhe Shqipërisë planifikuan të organizojnë një të ashtuquajtur Kupë Pan-Kombëtare, por turneu nuk u mbajt për shkak të shpërthimit të koronavirusit.
Dushku tha se në ditët në vijim, krerët e dy federatave do të informojnë zyrtarisht autoritetin botëror të basketbollit, FIBA, për planin.
“Ne do t’i informojmë ata në ditët në vijim, kur do të kemi një koncept të detajuar për ligën. Po diskutojmë skenarët, opsionet dhe një kalendar”, shtoi ajo.
Kosova është ndër anëtarët më të rinj të FIBA-s pasi u pranua në 2015.
Ish-basketbollisti i Kosovës Valentin Spaqi tha për BIRN se nëse klubet kosovare dhe ato shqiptare luajnë në të njëjtin kampionat, kjo do të ishte diçka e mirë për lojtarët.
“Do të ishte e dobishme për basketbollistët të cilët do të luanin më shumë ndeshje, por ka kuptim edhe nga këndvështrimi kombëtar”, tha Spaqi.
Por ai theksoi se liga e re e propozuar do të ishin një barrë financiare për klubet në vështirësi.
“Nëse kjo ligë materializohet, klubet duhet të kenë burime më të mira financiare për t’u përballur me shpenzimet e nevojshme”, tha ai.
