Instituti i Shëndetit Publik deklaroi se vetëm 2.6% e rasteve të testuara në 24 orët e fundit rezultuan pozitivë me virusin SARS-CoV-2.
Instituti i Shëndetit Publik konfirmoi 6 raste të reja me COVID-19 të shtunën, ndërsa numri total i personave të prekur shkoi në 856 persona. Marjeta Dervishi nga ISHP deklaroi se rastet e reja u zbuluan në dy vatrat aktive të Tiranës dhe Krujës.
Instituti i Shëndetit Publik kreu 224 testime në 24 orët e fundit. Testet pozitive përbëjnë vetëm 2.67% të personave të dyshuar. Që prej fillimit të epidemisë janë shëruar 627 persona, ndërsa 198 konsiderohen pacientë aktivë me COVID-19.
Të shtruar në spital gjenden 29 pacientë ose 14% e të prekurve aktivë, ndërkohë që pjesa më e madhe e tyre po trajtohen në shtëpi nga mjeku i familjes. Katër prej pacientëve ndodhen në terapi intensive.
“Prej më shumë se 10 ditësh nuk kemi më humbje jete,” tha Dervishi, duke e cilësuar këtë një tjetër të dhënë pozitive për kontrollin e epidemisë në vend.
Të shtunën, rrethi i vatrave u ngushtua vetëm në 11 bashki. Sipas Dervishit, numri më i lartë i pacientëve aktivë me COVID-19 është i shpërndarë në Tiranë, Krujë, Shkodër, Fier dhe Kamëz.
