Nga 121 persona të testuar në 24 orët e fundit, vetëm 4 kanë rezultuar pozitivë. Vatrat aktive të infeksionit janë Tirana, Shkodra dhe Kamza.
Shqipëria shënoi të hënën numrin më të ulët të rasteve të reja ditore me COVID-19, ku 4 qytetarë rezultuan pozitivë nga 121 persona të testuar në 24 orët e fundit. Eugena Tomini nga Instituti i Shëndetit Publik deklaroi se dy prej rasteve u zbuluan në Tiranë, 1 në bashkinë e Kamzës dhe i katërti në Shkodër.
Numri total i personave të prekur shkoi në 872 qytetarë, 654 prej të cilëve ose rreth 75% janë tashmë të shëruar. Ndërsa 187 persona të tjerë konsiderohen pacientë aktivë me COVID-19, shumica e të cilëve i përkasin vatrave të Tiranës, Krujës, Shkodrës dhe Kamzës.
Dy spitalet e vendosura në dispozicion të epidemisë po trajtonin së bashku 23 pacientë të hënën, tre prej të cilëve janë në terapi intensive. Numri i pacientëve të hospitalizuar përbën 12% të rasteve aktive në vend, ndërkohë që pjesa tjetër po trajtohet në shtëpi dhe nën monitorimin e mjekëve të familjes.
Instituti i Shëndetit Publik ka kryer 1189 testime që prej fillimit të epidemisë në Shqipëri. Tomini sqaroi se 1559 prej tyre janë testime molekulare, ndërsa 530 të tjera teste serologjike që po vazhdojnë të kryhen mes grupeve të rriskuara.
Pavarësisht zbutjes së masave, ISHP apeloi për respektimin e distancimit social dhe masave të higjienës personale për popullatën.
