Për të tretën ditë radhazi, numri i rasteve të reja me koronavirus në Shqipëri ka qenë katër, ndërsa numri i rasteve aktive ka rënë me shpejtësi.
Instituti i Shëndetit Publik identifikoi vetëm katër raste pozitive me koronavirus gjatë 24 orëve të fundit pasi kreu testime për 246 raste të dyshuara. Nga rastet e reja, dy në Berat dhe dy në Tiranë ndërsa qytetet e tjera nuk kanë pasur raste të reja. Nga ana tjetër, gjashtë pacientë rezultuan të shërua duke ulur numrin e rasteve aktive në 161.
Shqipëria ka nisur procesin e hapjes graduale të ekonomisë duke lejuar rinisjen e punës në disa sektorë por ekonomia pritet të mbetet në vështirësi edhe në muajt e ardhshëm ndërsa transporti ndërkufitar i pasagjerëve mbetet ende i bllokuar.
Koronavirusi i ri u identifikua për herë të parë në Shqipëri më 8 Mars dhe deri më sot ka prekur 880 qytetarë. Aktualisht ka 11 qytete që kanë banorë me raste pozitive ku qendrat më të mëdha janë Tirana dhe Kruja.
