Pas një jave me numra të ulët ditorë, kurba e epidemisë së COVID-19 u rrit sërish të enjten me 18 persona pacientë të rinj dhe 898 qytetarë të prekur gjithsej.
Numri i rasteve të reja me COVID-19 u katërfishua sërish të enjten, pas një jave me nivel të ulët të pozitivitetit në Shqipëri. Eugena Tomini nga Instituti i Shëndetit Publik deklaroi të enjten se në 24 orët e fundit ishin zbuluar 18 raste të reja me COVID-19; ndryshe nga tre ditët e fundit kur kurba ishte stabiluar në katër raste në ditë.
Shumica e rasteve të reja është konfirmuar në Tiranë me 11 pacientë të rinj të COVID-19, e ndjekur nga Kruja me 4 raste, Berati me 2 raste dhe Durrësi me një rast.
“Janë testuar 191 qytetarë dhe pjesa më e madhe e rasteve pozitive kanë qenë kontakte të rasteve të mëparshme,” tha Tomini në një deklaratë për mediat. “Pavarësisht numrit të rasteve të reja, situata paraqitet e qëndrueshme, por tregon qartë që kujdesi i qytetarëve duhet të vazhdojë për të respektuar masat e vendosura,” shtoi ajo.
Të enjten, numri total i të prekurve nga virusi SARS –CoV-2 shkoi në 898 qytetarë, 77% e të cilëve konsiderohen tashmë të shëruar. Numri i pacientëve aktivë është 173, të përqendruar kryesisht në Tiranë, Krujë, Shkodër dhe Kamëz.
Numri i pacientëve që po marrin trajtim në spital u ul në 19 të enjten, tre prej të cilëve janë në terapi intensive. Numri i pacientëve të hospitalizuar përbën 10% të të prekurve aktivë në Shqipëri.
Autoritetet shëndetësore përsëritën apelin e zbatimit të masave të distancimit social dhe ato të higjienës personale për qytetarët, pavarësisht lehtësimit të masave nga ana e qeverisë.
“Rastet e sotme pozitive tregojnë se strategjia e rihapjes dhe lehtësimi i masave varet vetëm nga ju. Qytetarët duhet të jenë të kujdesshëm dhe të mos neglizhojnë shenjat e sëmundjes COVID-19,” tha Tomini nga ISHP.
