Shqipëria shënoi për të dytën ditë radhazi 18 raste të reja me COVID-19, shtatë prej të cilëve në një fasoneri në Durrës. Ministria e Shëndetësisë paralajmëron hapa pas nëse tendenca vazhdon.
Shqipëria shënoi për të dytën ditë radhazi një numër të lartë të rasteve të reja me COVID-19, ku 18 qytetarë rezultuan pozitivë nga 219 testime të kryera gjithsej. Rritja e përhapjes së infeksionit ndodh paralelisht me lehtësimin e masave nga ana e qeverisë; një skenar që ka shkaktuar shqetësim mes autoriteteve shëndetësore.
E pranishme në komunikimin ditor, ministrja e Shëndetësisë paralajmëroi se nëse tendenca e ditëve të fundit vazhdon, do të bëhen hapa pas në planin e lehtësimit të masave.
“Kjo është dita e dytë me rritje të infeksioneve dhe ky është maksimumi i lejuar në projeksionit tona. Nëse gjërat vazhdojnë me tendencën e ditëve të fundit, do të jemi të detyruar të bëjmë hapa pas dhe kjo nuk është në interesin e asnjërit prej nesh,” tha Manastirliu duke përsëritur apelin për respektimin e distancimit fizik nga qytetarët.
Vatra e re e përhapjes së koronavirusit është një fabrikë fasonerie në Durrës, ku shtatë punonjës kanë rezultuar pozitivë. Virusi SARS-CoV-2 ka prekur fillimisht një punonjëse të fabrikës së prodhimit të këpucëve “Endi” sh.p.k me seli në Shkozet dhe është përhapur më pas tek punonjësit e tjerë.
Shtim të rasteve ka pasur edhe në Berat, ku 5 persona kanë rezultuar pozitivë në 24 orët e fundit, mes të cilëve edhe një personel shëndetësor. Dy raste të tjera janë shënuar në Krujë dhe katër raste në qytetin e Tiranës.
Numri total i të prekurve me COVID-19 u rrit të premten në 916 persona. Mbi 75 për qind e të prekurve janë tashmë të shëruar, ndërkohë që numri më i madh i pacientëve aktivë është i shpërndarë në Tiranë, Shkodër, Krujë, Kamëz dhe tashmë edhe në Berat.