Pamundësia për të njoftuar ish-Ministrin e Brendshëm Saimir Tahiri për seancën e përcaktuar të zhvillohej të enjten më 28 maj, është bërë shkak për shtyrjen për të katërtën herë të gjyqit në Apel.
Është shtyrë sërish seanca gjyqësore në ngarkim të ish-ministrit të Brendshëm Saimir Tahiri dhe ish-drejtuesit të policisë së Vlorës Jaeld Çela në Gjykatën e Posaçme të Apelit kundër Korrupsionit dhe Krimit të Organizuar. Të enjten, më 28 maj ishte caktuar që të zhvillohej seanca e radhës, por është shtyrë për shkak se gjykata ka vlerësuar se i pandehuri Saimir tahiri nuk ka marrë dijeni.
Në seancë ka qenë i pranishëm i pandehuri tjetër Jaeld Çela i cili u dorëzua në polici dy javë më parë, pas rreth dy vitesh e gjysmë në arrati. Gjithashtu, ishin të pranishëm edhe avokatët mbrojtës të të pandehurve. Seanca e radhës u caktua të zhvillohet më datë 11 qershor. Tahiri po gjykohet nga gjyqtaret Nertina Kosova, Nure Dreni dhe Albana Boksi.
Në shtator të vitit të kaluar, Saimir Tahiri u shpall fajtor nga ish-Gjykata e Krimeve të Rënda për veprën penale “shpërdorim detyre”, ndërsa mori pafajësi për veprat penale më të rënda të trafikut ndërkombëtar të drogës dhe pjesëmarrje në organizatë kriminale.
Në përfitim të gjykimit të shkurtuar, Tahiri u dënua me 3.4 vjet burg, dënim i cili u pezullua nga gjykata me një afat 3-vjeçar. Së bashku me Tahirin u shpall fajtor për “shpërdorim detyre” edhe ish-drejtuesi i policisë së Vlorës, Jaeld Çela.
Tahiri dhe Çela u akuzuan nga Prokuroria e Krimeve të Rënda për implikim në trafikun e narkotikëve, e kryer nga një organizatë e krimit të organizuar e drejtuar nga vëllezërit Habilaj.
Anëtarët e organizatës së drejtuar nga vëllezërit Habilaj, kushërinj të ish-ministrit, u ndaluan në tetor të vitit 2017 nga autoritetet italiane dhe u dënuan në qershor të 2019-ës. Ndërkohë, një proces paralel për ta filloi edhe në Shqipëri. Ata u arrestuan nga policia Italiane teksa po tentonin të trafikonin një sasi të konsiderueshme lënde narkotike nga Shqipëria drejt Italisë.
