Aktivistët e Lëvizjes për Universitetin po mbledhin firma nëpërmjet një peticioni online me qëllim anulimin e tarifave për vitin akademik 2019-2020, pas vështirësive të shumta që studentët kanë përjetuar si pasojë e pandemisë.
Me anë të një peticioni online që do t’i drejtohet Ministrisë se Arsimit, Rinisë dhe Sportit, aktivistë të Lëvizjes për Universitetin (LPU) po mbledhin firma për anulimin e tarifave universitare të këtij viti akademik, të cilat ato i konsiderojnë të pavend pasi ngjarjet e muajve të fundit kanë krijuar vështirësi të shumta në shërbimet e arsimit t ë lartë dhe të aksesit në procesin mësimor.
“Në dy ditë janë plotësuar rreth 5000 firma dhe në vazhdim do të presim plotësimin e firmave të tjera dhe më pas do ta dërgojmë në ministri,” tha për BIRN aktivistja Ariela Zeneli.
Gjatë muajit prill Lëvizja për Universitetin zhvilloi një sondazh virtual mbi kushtet e mësimit online. Sipas sondazhit gati 60% e studentëve janë shprehur se mësimi online është i papërshtatshëm.
Sondazhi i muajit prill zbuloi se më shumë se gjysma e studentëve ndjeheshin të stresuar për shkak të vështirësive ekonomike dhe të vështirësisë për të aksesuar leksionet online, e dhënë e cili binte në kundërshtim me deklaratat e Ministres së Arsimit mbi procesin mësimor në distancë.
Sipas Lëvizjes për Universitetin mësimi online i këtyre muajve ka dështuar dhe një pjesë e konsiderueshme e studentëve nuk kanë pasur mundësi ta ndjekin, ndërkohë studentë të tjerë kanë hasur vështirësi në leximin e literaturës dhe shlyerjen e tarifave të arsimimit.Një tjetër arsye e listuar prej aktivistëve për anulimin e tarifave është edhe mungesa fizike në fakultet.
“Ne, studentët e universiteteve publike të Shqipërisë, kërkojmë anulimin e menjëhershëm të tarifave për vitin akademik 2019-2020,” bëjnë thirrje aktivistët.
“Në të kundërt, zotohemi të nisim një fushatë të gjerë bojkotimi të tarifave”, kërcënojnë ata.
I pyetur për peticionin e aktivistëve, Elton Skëndaj drejtori i drejtorisë së komunikimit në Universitetin e Tiranës, u shpreh se pa pasur akoma një shkresë zyrtare nuk mund të ketë një reagim nga ana e senatit apo rektoratit të Universitetit.
“Kërkesat e Lëvizjes për Universitetin kryesisht publikohen më gjerë në media, dhe rrallë herë ne kemi diçka zyrtare,” tha Skëndaj, duke theksuar gjithashtu se universitete të ndryshme kanë mënyra të ndryshme sesi i menaxhojnë kërkesat.
