Pas vendimit për mbarimin e mandatit, KLGJ vendosi t’i ofrojë gjyqtarit Ardian Dvorani një pozicion në Apel, por ai e konsideroi gafë juridike vendimin.
Këshilli i Lartë Gjyqësor vendosi të enjten me 6 vota pro mbarimin e mandatit të Ardian Dvoranit –anëtar i Gjykatës së Lartë dhe kryetar i Këshillit të Emërimeve në Drejtësi.
“U vendos që t’i ofrohet caktimi në një pozicion Apeli,” i tha BIRN mbrëmjen e të enjtes anëtari i KLGJ-së, Erjon Muharremaj.
Katër anëtarë të KLGJ-së votuan kundër mbarimit të mandatit, me argumentin se Z.Dvorani duhej të qëndrojë në detyrë deri në zëvendësimin e tij. Vetë Dvorani e cilësoi vendimin e KLGJ-së një gafë juridike.
“Juridikisht është një gafë e paimagjinueshme. Por duhet të shikoj çfarë do të katranosin në arsyetim. Reforma e drejtësisë ka ende rrugë të gjatë për të provuar qëllimin e mirë të saj,” tha Dvorani përmes një mesazhi.
Ardian Dvorani është zgjedhur anëtar i Gjykatës së Lartë në vitin 2005 dhe mandati i tij 9-vjeçar ka përfunduar që në vitin 2014. Megjithatë, Dvorani vazhdoi ta ushtronte detyrën në pritje të zëvendësimit edhe për 6 vite të tjera.
KLGj u vu në lëvizje për këtë çështje nga Presidenti Ilir Meta, konflikti i të cilit me Dvoranin vijoi prej muajsh për procedurën e dekretimit të anëtarëve të Gjykatës Kushtetuese. Meta i kërkoi KLGj-së në fund të prillit që të shprehej ose të njoftonte përfundimin e mandatit të Dvoranit pas zgjedhjes së tre anëtarëve të rinj të Gjykatës së Lartë.
Në një mbledhje të mëparshme më 5 maj, Këshilli i Lartë Gjyqësor u shfaq konfuz dhe i ndarë për mandatin e Dvoranit në Gjykatën e Lartë dhe vendosi që t’i kërkonte mendim ndërkombëtarëve. Por këta të fundit refuzuan të japin opinion, duke e konsideruar këtë një përgjegjësi ekskluzive të KLGJ-së.
Vetë Dvorani shprehu atëherë qëndrimin e tij në një letër drejtuar KLGj, ku argumentonte se nuk ishte zëvendësuar nga tre të zgjedhurit së fundmi si anëtarë të Gjykatës së Lartë dhe se i takonte të largohej nga detyra vetëm me zgjedhjen e anëtarit të katërt.
Konflikti, më shumë se sa për postin në Gjykatën e Lartë dukej se kishte të bënte me pozicionin e tij në krye të Këshillit të Emërimeve në Drejtësi.
Presidenti e ka kallëzuar penalisht Dvoranin për rolin e tij në këtë institucion, kryesisht mbi radhën e ndjekur nga KED për njoftimin e kandidaturave për emërimet në Gjykatën Kushtetuese, që futën në përplasje presidencën me shumicën parlamentare.