Protestat e rradhës kundra abuzimit me gratë dhe vajzat u zhvendosën në Kamëz, ku disa dhjetra qytetare në pamundësi për të marrë leje nga policia për shkak të ndalimit të tubimeve, u organizuan personalisht në mënyrë virtuale duke përgatitur dyqind slogane në thirrje kundra fenomenit të abuzimit seksual.
Pasditen e së enjtes, një grupim vajzash nga zona e Kamzës, me të cilat u solidarizuan në mënyrë virtuale edhe shumë të tjera nga qytete të ndryshme të Shqipërisë, arritën të publikojnë rreth 200 slogane brenda 1 ore, në formë solidarizimi dhe në pamundësi për të tubuar si zakonisht për shkak të masave strikte që kanë ndaluar grumbullimet gjatë këtyre ditëve.
Ato zgjodhën këtë formë alternative protestimi nëpërmjet postimit të fotove, duke denoncuar dhunën seksuale ndaj vajzave me anë të parullave që mbanin në duar.
Këto qytetarë të Kamzës i janë bashkuar nismës së rrjetit POP të 9 organizatave të shoqërisë civile.
Që prej ngjarjes së javëve të fundit të abuzimit seksual me një minorene 15-vjeçare nga roja i shkollës në zonën e Babrrusë, nuk kanë reshtur protestimet e qytetarëve apo të shoqërisë civile në mbrojtje të grave dhe vajzave shqiptare dhe në denoncim të fenomenit të dhunës ndaj tyre.
Vendi ynë ndodhet në situatë të fatkeqësisë natyrore deri më 23 Qershor, e si pasojë e emergjencës së shkaktuar prej pandemisë COVID-19 tubimet janë ndaluar në mënyrë kategorike, duke sjellë si pasojë gjetjen e këtyre zgjidhjeve virtuale të tubimeve nëpërmjet sloganeve në rrjetin social të facebook-ut.
Duke përdorur hashtagun #Kamëz, postuan eventin edhe shumë qytetarë të tjerë në Bashkitë e Tiranës, Durrësit, Fierit, Vlorës, Shkodrës, Pukës dhe Pogradecit.
