Banorët e një lagjeje në Labinot Fushë protestuan kundër kompanisë “Rozafa Fish City” të cilë e akuzuan për ndotje dhe zaptim të pronave. Një përfaqësuese e kompanisë akuzoi ish-deputetin Luçiano Boçi për protestën.
Banorët e Labinotit Fushë protestuan të shtunën ndaj biznesit të përpunimit të peshkut Rozafa Fish City të vendosur në magazinat e ish-Rezervave të Shtetit të kësaj zone. Rreth 30 familje në zonë akuzojnë kompaninë se po u merr tokat dhe se ka ndotur mjedisin rreth tyre dhe se nderdh mbetje në lumin Shkumbin.
Me pankarta në duar burra, gra e fëmijë u mblodhën përballë hyrjes së komapnisë “Rozafa Fish City” duke e akuzuar kompaninë dhe pronarin e saj për zaptim pronash, ndotje të ajrit dhe lumit. Një 45-vjeçar, që u identifikua si F.Bica i tha BIRN se kompania “Po bën gjithçka që të zaptojë atë që është e jona”.
Ndërsa një grua që kërkoi të mos i përmendej emri duke pretenduar se mund të kërcënohej nga njerëzit e kompanisë tha se shumë nga fqinjët e saj ishin kërcënuar dhe kishin shitur tokën të kompania dhe se para një presioni të tillë ishin edhe të tjerë banorë. Gruaja tha se në zonë jetonin 30 familje me të njëjtin mbiemër.
E pyetur për protestën dhe akuzat Lisena Metoshi, administratore e kompanisë, tha se bëhej fjalë për një familje dhe tre vëllezër bashkë me të afërmit e tyre. Ajo tha se disa nga protestuesit punojnë për kompaninë dhe nuk kanë pasur asnjë problem. Ndërsa akuzoi ish-deputetin e opozitës për protestën. “Pyesni PD dhe z.Luçiano Boçi për këtë turp që bëri për një biznes shembull siç është Rozafa Fish City”.
Ish-deputeti i PD Boçi që ishte në protestë akuzoi akuzoi policinë se po tregohet e njëanshme duke mos marrë asnjë masë pas denoncimeve të banorëve për kërcënime.
Po ashtu edhe disa banorë thanë se kanë bërë kallëzime në polici për kërcënimet, por se këto nuk i ka hetuar askush. Një javë më parë një prej banorëve publikoi një video që tregonte derdhje të materialeve në shkumbin nga një makinë me logo të kompanisë. Personi thotë në video se ato që po derdheshin ishin mbetje të peshkut. Të kontaktuar përfaqësues të Inspektoriatit të Mjedisit thanë se deri tani nuk kanë bërë asnjë kontroll lidhur me ndotjen e pretenduar pasi nuk kanë pasur ankesë me shkrim për këtë shqetësim.
Banorët thanë se kishin vënë në dijeni kreun e bashkisë Elbasan Gledian Llatja, por se nga ai nuk kanë marrë asnjë përgjigje për kërkesat e tyre. I kontaktuar nëpërmjet telefonit kryetari i bashkisë ashtu si kompania fajësoi PD për protestën, ndërsa tha se i kishte sqaruar banorët. “Protesta e sotme është totalisht protestë e nxitur nga ish-deputeti i PD”, tha Llatja, ndërsa pretendoi se kishte caktuar një takim për një përfaqësi të banorëve për mundësinë e dhënies së tokave me qira*.
*Ky shkrim u ndryshua për të përfshirë qëndrimin e kryebashkiakut Gentian Llatja.
