Shqipëria përjetoi ditën me numrin më të lartë të pacientëve të konfirmuar me COVID-19 ndërsa autoritetet përsërisin thirrjet për kujdes. Nga ana tjetër, koronavirusi i ri nuk ka shkaktuar viktima të tjera tashmë prej shumë ditësh.
Autoritetet shëndetësore identifikuan 69 pacientë të rinj të prekur nga koronavirusi gjatë 24 orëve të fundit ndërsa përsëritën thirrjet për kujdes personal, higjenë dhe distancim social ndërkohë që numri i pacientëve aktivë po i afrohet shifrës 500 ndërsa aktiviteti ekonomik i vendit është rivënë në punë pothuajse pa kufizime.
Dr. Eugena Tomini nga Instituti i Shëndetit Publik deklaroi në buletinin e të hënës: “Gjatë javës së fundit kemi një rritje të numrit të rasteve pozitive dhe një rritje të të shtruarve në spital por kemi qëndrueshmëri për sa i takon fataliteteve.”
Sipas Tominit, burimet kryesore të përhapjes së infeksionit janë bizneset dhe për këtë arsye ajo i bëri thirrje bizneseve të zbatojnë protokollet e sigurisë.
Aktualisht në Shqipëri ka 499 persona të prekur nga koronavirusi nga të cilët, 50 janë të shtruar në spital. Shtatë persona janë nën terapi intensive.