Vojisllav Shesheli, i dënuar në vitin 2018 për nxitje të krimeve të luftës në fshatin Hrtkovci në vitin 1992, nuk do të ketë më vend në parlamentin e Serbisë, pasi Partia e tij Radikale Serbe nuk arriti të fitonte votat e mjaftueshme në zgjedhjet e mbajtura të dielën.
Ultranacionalisti serb Vojisllav Shesheli, kryetari i Partisë Radikale Serbe, SRS, dhe një i dënuar për krime lufte në vitin 2018, nuk do të ketë më një vend në parlamentin serb pasi partia e tij nuk arriti të fitonte vota të mjaftueshme në zgjedhjet e mbajtura të dielën.
Sipas rezultateve jo të plota, SRS fitoi pak më shumë se 2 për qind të votave, që ishte nën pragun prej 3 për qind që nevojitet për të hyrë në parlament.
Shesheli ka qenë një figurë e rëndësishme në jetën politike në Serbi që nga fillimi i viteve 1990. Ai dhe SRS-ja e tij ishin një faktor në parlamentin serb gjatë sundimit të Sllobodan Millosheviçit, herë duke vepruar si një parti opozitare dhe herë si pjesë e koalicionit qeverisës. Ai ishte zv/kryeministër nga viti 1998 deri në vitin 2000.
Në vitin 2003, Shesheli u dorëzua me dëshirë në Gjykatën Penale Ndërkombëtare për ish-Jugosllavinë, ICTY, në Hagë, për t’iu përgjigjur akuzave se kishte kryer krime lufte gjatë luftërave në ish-Jugosllavi në vitet 1990, kur ai ishte një eksponent i flaktë i ideologjisë së një Serbie të madhe dhe përkrahës i forcave paraushtarake që luftonin në Kroaci dhe Bosnje.
Gjyqi i tij u zvarrit për vite me radhë dhe filloi vetëm në vitin 2007. Ndërkohë partia e tij vazhdoi të gëzonte rezultate të mira në zgjedhje deri në vitin 2014, kur për herë të parë SRS-ja nuk arriti të fitonte ndonjë vend në parlament.
Atë vit, Shesheli u kthye në Serbi pasi gjykata e Kombeve të Bashkuara e liroi atë nga paraburgimi gjatë gjyqit të tij dhe lejoi që ai të kthehej në shtëpi për t’u kuruar nga kanceri. Në zgjedhjet e parakohshme të vitit 2016, SRS-ja u rikthye përsëri në parlament.
Në vitin 2016 Gjykata e Hagë e liroi Sheshelin nga akuzat për krime lufte. Por, në prill të vitit 2018, Mekanizmi për Gjykatat Penale Ndërkombëtare, duke iu përgjigjur një apeli, e ndryshoi vendimin dhe e dënoi Sheshelin në mungesë me dhjetë vjet burg për nxitje të krimeve të luftës kundër kroatëve etnikë në fshatin serb të Hrtkovcit në vitin 1992. Megjithatë, për shkak të viteve që kishte kaluar në paraburgim, ai u desh ta vuante dënimin e tij.
Sipas ligjit në Serbi, nëse një deputet dënohet me më shumë se gjashtë muaj burg, mandati i tij duhet të përfundojë. Por ligji nuk është zbatuar kurrë për Sheshelin.
Gjatë kohës së tij në parlament, ai ka mohuar që në Srebrenicë të jetë kryer ndonjë krim lufte, ndër të tjera. Në shkurt të vitit 2019, ai mblodhi mbështetësit e tij në një tubim para Gjykatës së Lartë të Beogradit përpara seancës dëgjimore në gjyqin e një ish-polici për masakrën e boshnjakëve nga Srebrenica në fshatin Kravicë në vitin 1995.
Partia Progresive Serbe në pushtet u themelua nga dy ish-bashkëpunëtorë të ngushtë të Sheshelit, Aleksandër Vuçiç dhe Tomislav Nikoliç, të cilët u larguan nga SRS-ja dhe formuan një parti të re.
