Me SHBA-në që vazhdon rrugën e saj për arritjen e një marrëveshjeje midis Serbisë dhe Kosovës, BE-ja i ka ftuar të dyja palët në Bruksel para se ata të takohen në Uashington.
Bashkimi Europian do të sjellë këtë javë në Bruksel liderët e Kosovës dhe Serbisë, para një takimi të shumëpritur midis Aleksandër Vuçiç dhe Avdullah Hotit me mbështetjen e administratës Trump të shtunën.
E etur për arritjen e një suksesi në politikën e jashtme, vëzhguesit thonë se Shtetet e Bashkuara po e lënë gjithnjë e më në anë BE-në në përpjekje për të ndërmjetësuar një marrëveshje midis Serbisë dhe ish provincës së saj jugore 12 vjet pasi Kosova shpalli pavarësinë me mbështetjen e fuqive të mëdha perëndimore.
I dërguari special i Trump, Richard Grenell, do të mbledhë në Uashington më 27 qershor presidentin serb Vuçiç dhe kryeministrin e Kosovës Hoti, pasi tha se “normalizimi ekonomik” duhet të vijë para çdo normalizimi politik të ndërmjetësuar nga BE-ja.
Por Hoti ka njoftuar se ai do të shkojë fillimisht në Bruksel dhe Vuçiç të hënën tha se edhe ai shpreson të kalojë një ditë atje, pasi të takohet me presidenti rus Vladimir Putin në Moskë. Nuk ishte e qartë nëse Vuçiç dhe Hoti do të takohen gjatë kohës që do të jenë në Bruksel.
Dialogu i ndërmjetësuar nga BE-ja është lënë pezull që nga fundi i vitit 2018 pjesërisht për shkak të një mosmarrëveshje mbi tarifat e importit, por Brukseli shpreson që ai të rifillojë në korrik. Serbia nuk e njeh Kosovën, por BE-ja thotë se integrimi në bllok varet nga “normalizimi” i marrëdhënieve midis dy vendeve.
Takimi në Uashington vjen vetëm disa javë pasi Hoti u caktua si kryeministër dhe disa ditë pas fitores së radhës të Partisë Progresive në pushtet të Vuçiçit, që kritikët thanë se rrezikon ta kthejnë Serbinë në një shtet me një parti.
Në një postim në Facebook të hënën, Hoti tha se ai do të ishte në Bruksel më 25 qershor për të takuar, midis të tjerave, Presidenten e Komisionit Europian Ursula von der Leyen, Presidentin e Këshillit Europian Charles Michel dhe Komisionerin për Zgjerimin e BE-së, Oliver Varhelyi.
Ai tha se ata do të diskutonin luftën kundër COVID-19, mbështetjen e BE-së për rimëkëmbjen ekonomike të Kosovës nga pandemia dhe liberalizimin e vizave për shtetin më të ri të Europës.
Pas takimit me ndërmjetësin e BE-së Miroslav Lajçak të hënën në Beograd, Vuçiç tha për gazetarët: “Unë nesër do të shkoj në Moskë. Shpresoj të kem një ditë kohë për një vizitë në Bruksel, për të ardhmen tonë europiane. Dhe pas kësaj do të shkoj në Uashington.”
