Gjykata e Posaçme e Apelit vendosi mbylljen e shqyrtimit gjyqësor për ish-ministrin e Brendshëm, Saimir Tahiri dhe ish-kreun e Policisë së Vlorës, Jaeld Çela, por mori dy ditë kohë për shpalljen e vendimit për shkak të “kompleksitetit të çështjes”.
Gjykata e Posaçme e Apelit për Korrupsionin dhe Krimin e Organizuar vendosi të mërkurën të shtyjë me dy ditë seancën për shpalljen e vendimit për ish-ministrin e Brendshëm, Saimir Tahiri dhe ish-drejtuesin e Policisë së Vlorës, Jaeld Çela, të akuzuar nga Prokuroria për trafik droge në kuadër të grupit të strukturuar kriminal.
Sipas koordinatores për të drejtën e informimit, Elisa Spahiu, trupi gjykues i dha fund shqyrtimit gjyqësor dhe e shtyu seancën për shpalljen e vendimit më datë 26 qershor, ora 13:00.
“Për shkak të kompleksitetit të çështjes dhe akteve bashkëngjitur fashikullit të gjykimit është në pamundësi absolute për t'u marrë brenda ditës së sotme,” u përgjigj Spahiu mbi motivin e shtyrjes së vendimit.
Procesi në Apel ndaj Tahirit është shqyrtuar nga trupa e përbërë nga Albana Boksi, Nertina Kosova dhe Nure Dreni. BIRN mësoi se pas shkarkimit të Drenit nga vetingu më 17 qershor është bërë zëvendësimi i saj me gjyqtarin Dhimitër Lara.
Tahiri doli i buzëqeshur nga Gjykata e Posaçme e Apelit mëngjesin e së mërkurës, por refuzoi të komentonte shtyrjen e vendimit. Ish-ministri i mohon akuzat e Prokurorisë dhe kërkon pafajësi.
Më 19 shtator 2019, ish-gjykata e Krimeve të Rënda e Shkallës së Parë i dha pafajësi Tahirit për akuzat e trafikimit të narkotikëve dhe grupit të strukturuar kriminal dhe e dënoi atë për veprën penale të shpërdorimit të detyrës.
Gjykata i dha Tahirit 5 vjet burg, i cili u reduktua në 3.4 vjet për shkak të gjykimit të shkurtuar. Gjithashtu, gjykata vendosi pezullimin e dënimit për tri vjet.
Në ankimin e kryer në ish-Gjykatën e Apelit për Krime të Rënda, aktualisht shkalla e dytë e Gjykatës së Posaçme, Tahiri kundërshtoi edhe dënimin e dhënë nga gjykata për “shpërdorim detyre”. Ankim kreu edhe ish-Prokuroria për Krime të Rënda, duke e kundërshtuar rrëzimin dhe ndryshimin e akuzave.
Përballë Gjykatës së Posaçme të Apelit, si Tahiri ashtu edhe përfaqësuesit e Prokurorisë i qëndruan argumenteve të dhëna në shkallën e parë. Prokurorët Vladimir Mara dhe Dritan Prençi kërkuan dënimin e Tahirit me 12 vjet burg, duke i qëndruar akuzave për trafikim droge në kuadër të grupit të strukturuar kriminal, ndërkohë që ish-ministri Tahiri dhe Çela kërkuan pafajësi.
